Aizawl: Khawthlangtuipui chim chinin tlak hniam hret hret avangin tui lianin chenna in a kamsan tak thenfai hnatlang chu nimin khan YMA : Tlabung branch huaihawtin neih a ni.
Nimin thleng khan Tlabung khaw chhung bikah chenna in 50 chuang chu tuiin la chim mah se chenna in thahnem tak chu tuiin a kamsan tawh a, tui lian a kam hnuah chirh chhah tak tak a hnutchhiah thin avangin tuilianin a kamsan chenna in chu YMA : Tlabung branch-in khawtlang huap hnatlanga thawkchhuak mi tlawmngaiten nimin khan an thian fai tan a ni.
Hetih lai hian Tlabung Village Council-ten tui lian tuar hmun him lama insaseng zinga tanpui ngai zuala an hriat an thlan chhuah chhungkaw 70-te hnenah thlawnin buhfai an sem a ni.
Tuilianin kam lam a pan hret hret zel avang hian Tlabungah chuan mipui khawsak phung pawhin ziaawm lam a pan ve zel a, hetih lai hian tui lian vanga chenna in chhuahsante zingah mahni chenna in lama let leh an la awm lo va, tual chhunga zirna in thenkhat chu tui lian tuarte awm lailawkna tur atan hman a nih avangin nimin pawh khan khar a la ni hlawm.