MPCC President Lalsawta chuan MNF party-in NDA an thlawp loh thu chu MNF headquarters emaw, chief ministers’ office atangin emaw, Mizoram mipui hriata a puanzar a phut.
Nimina Congress Bhawan-a inkhawmah thu sawiin Lalsawta chuan parliament fur thutkhawmah Mizoram MP pahnih, K Vanlalvena leh C Lalrosanga ten BJP kaihhruai NDA sorkar rintawk lohna (no confidence motion) thlawp zawnga voice vote an pe chu lawmawm a tih thu a sawi a. “MNF Headquarters emaw, Chief Ministers’ Office atangin emaw, Mizoram mipui hriatah MNF party-in NDA sorkar a thlawp loh thu hi puangzar ngei rawh se tih hi ka ngenna a ni,” a ti.
Lalsawta chuan kumin tawpa MLA inthlanpui lo awm turah MNF party in BJP zawm lo anga Mizo mipuite a bum leh mai mai dawn a nih chuan mipuiin an tuar nasa tawk a, bum tlak an ni tawh lo a. Kum 1966-a mipui tawhna kha a tawk tawh tih a sawi.
MPCC Treasurer Dr Lalmalsawma Nghaka pawhin Mizoram MP pahnih, K. Vanlalvena leh C. Lalrosanga ten parliament-a BJP kaihhruai NDA sorkar rintawk lohna thlawp zawnga vote an pe chu lawmawm a tih thu a sawi a. MNF-in BJP kaihhruai sorkar an rintawk tawh loh takzet chuan NDA leh NEDA atanga inla hrang a, sakhaw zalenna duhtu pawl Lalsawta kaihhruai Congress party hmalakna a din, Mizoram Secular Alliance a lo tel ve turin MNF party a sawm.
Dr Lalmalsawma chuan, “Heti khawpa kan hnam leh kan sakhuain a tawrh laia ZPM leader-in BJP an thawhpui dawn leh dawn loh a la sawi thei lo hi a pawi ka ti a, Kan hnam leh sakhaw himna a ngaih pawimawh lohzia a chiang a ni,” a ti bawk.
Chhung inkhawm hi R. Vanlalvena, GS MPCC & Ex-MLA in a kaihruai a ni.