Chief Minister Zoramthanga’n nimin khan Mizo Hnam Run chhung inkhawmah thu sawiin, BJP kaihhruai National Democratic Alliance (NDA)-ah issue base-a tel mai an nih thu leh a thu azirin an thlawpin an thlawp lo mai niin a sawi.
MNF president ni bawk, Zoramthanga chuan parliament monsoon season-ah India sorkar paih thlak turin rintawk lohna put luh a ni a. Mipuiin MNF chu NDA-ah a tel avangin a thlawp leh thlawp loh an ngaihtuah nasa a, MNF MP-te chet dan chu mipuiin an hriat vek thu a sawi.
Central-ah pawl lian tak pahnih, Congress telna UDA leh BJP kaihhruai NDA an awm a, MNF chu Congress telnaa awm chi an nih loh thu sawiin Zoramthanga hian, “NDA-a kan tel dan hi issue base-in kan tel mai a, an thu azirin kan thlawpin kan thlawp lo mai. MNF chu ‘Pathian leh kan ram tan’ tia nghet taka thuthlung vuantu kan ni,” a ti.
CAB pawh Mizoramah hman duh loin an do a, an hmang lo mai tih sawiin MNF president chuan, “UCC pawh NDA chhawpchhuah ni mah se, kan vote-pui lo. Prime minister hnenah lehkhate pawh ka thawn a, kan duh loh leh kan do dawn tih nasa takin ka hrilh mai a ni,” tiin, tun tum parliament-ah no confidence motion bulpui ber chu Manipur buaina a ni a, central-a eptuin an put luh kha an thlawp mai tih a sawi.
Zoramthanga hian parlianment-a sorkar rintawk lohna motion put luh an thlawp chungchangah Assam chief minister-in a zawh thu leh union home minister tirhah rawn zawt nia a rin thu a sawi a. “Eptu lam kan thlawp tur thu tlang takin ka hrilh a. Assam chief minister chuan absent mai turin min ngen a. Pu C. Lalrosanga, kan MP (LS) pawh a nu damlo ICU-ah a awm lai ni mah se, tel luiin a thlawptu-ah a tang a ni,” a ti.
Chief minister chuan Congress thalaiin no confidence motion thlawp tura a banglaa luh tuma tihtir an tum hma khan an thlawp loh tur thu an tifel dim diam tawh tih sawiin, Information Minister Lalruatkima chu an thil tum hrilh chiang tura a hrilh thu a sawi a. Congress thalaite an punkhawm lai khan Mizoram Kohhran Hruaitu Committee (MKHC) hotute nena an inkawm lai niin, an haw hun pawh an tihbuai vek thu a sawi.
NDA-a an tel avang hian a chhung atangin an duh loh zawng chu na takin an nawr ngam tih sawiin Zoramthanga hian, “MNF chu NDA kan tel avangin Pu Modi-a thu thua kal kan ni ve lo. A hma pawh khan an duh loh em em Burma lama kan unau raltlante pawh an ei leh in, silh leh fen nen khawvel hriatah kan pek tur thu kan puang a. Pu Modi-a hnenah pawh ka nute lama ka nu nuta pahnih chu Burma ramah lu an phum thu ka hrilh a. Burma refugee-te tanpuina turin vaibelchhe 10 ka dil laiin, vaibelchhe thum chauh min pe nghe nghe a ni,” a ti bawk.
Hnam Run chhung inkhawmah hian MNF president hian an party zawm thar a lawm lut nghal bawk.