National Crime Records Bureau chuan India rama kum nga liam ta, 2018 leh 2022 inkar khan acid hmanga inbeihna (acid attack) tuartu mi 1,483 zet an awm niin a tar lang.
Kum 2021 kha kum nga chhunga acid attack a thlan zin ber kum niin vawi 309 thlengah a tuartu mi 319 an awm.
Kum 2021 leh 2022-ah hian acid attack thubuai 596 a awm a, a tuartu chu mi 623 an tling a. Heng kum hnihah hian a titu mi 149 ve ve chauh thubuai siamsak an ni.
Thubuai a awm tlem ber kum chu kum 2018 kha niin tum 214 a thleng a, hengah hian a titu mi 201 zet thiam loh chantir an ni thung.
Uttar Pradesh, West Bengal leh Delhi chu kum nga liam ta chhung hian kum tin acid attack a thlen tamna state 10 zingah an lang ziah a. Heng state pathumah hian India ram puma thleng zinga 42% zet acid attack hi a thleng.
A titu thiam loh chantirna lamah chuan kum 2019 kha a san ber tum a ni a, mi 734 lai thubuai siamsak niin heng zinga 45.4% chu thiam loh chantir an ni a. Hetih rual hian hemi kum veka thubuai chinfela thiam loh chantir chu mi 33 chauh an ni.
Kum 2019 leh 2020 khan acid attack thubuaia man, thiam loh chantir emaw, thubuai chinfel emaw hi a tlahniam nasa hle a. Thubuai 67 ngaihtuah zingah 25 chauh a titu chungthu ngaihtuah fel a ni a, he kum hnihah hian thubuai 849 zet chu ngaihtuah tura tih erawh a awm a, ngaihtuah zat erawh a tlem hle.