Algeria chuan tun laia an rama mi 69 zetin an thih phah tawh, an ram chanchina ram kang nasa ber ni mek bultantu nia an hriat mi 22 an man.
Algeria hmar lam tlangram, an khawpui, Algiers khawchhak lam, Kabylie province-a Tizi Ouzou leh a chhehvel dang dangah Thawhtanni atang khan ram hi a kang tan.
“Hmun thenkhata mi hi khaw lum lutuk vanga kang a ni thei a; mahse, a phenah hian mi sualte kuthnu a awm a ni,” tiin President Abdelmadjid Tebboune chuan Ningania sorkar TV-a thu a sawiah a sawi lang.
“Rinhlelh mi 22 kan man tawh a, an zinga 11 hi Tizi Ouzou-a mite an ni a. An chungah dan anga chet a ni ang,” a ti.
Africa hmar lam ramah hian ram kang avang hian sipai 28 vel an thi tawh a, sipaite hi kang thelh tur leh mipui tlanchhiate pui tura dah an ni.
“Chhiatna, … chhiatna rapthlak tak a ni a; mahse, kan chakna hi a tlusawp mai dawn lo,” tiin Tebboune chuan a sawi a. Ram kang tuarte tana hmun (province) dang atanga puitu, damdawi, ei tur leh mamawh hrang hrang petute chungah lawm thu a sawi bawk.
“Kan inpumkhatna hi kan vawng nung zel ang. Kan inpumkhat tak zat a ni,” a ti.
Algerian thuneitute hian ram kang hi an la thelh hleithei lo.
“Sorkarin helicopter tam tak a tir chhuak a; mahse, hengte hi tui litre 1,000 chauh phur thei bambi bucket a keng,” tiin Tizi Ouzou-a chanchinbumi pakhat chuan a sawi.
Kangthelh thlawhna hi European Union hnenah pawh thlawn turin sorkar hian a ngen a. France chuan Ningani khan tui litre 7,000 vel phur thei pahnih a thawn a, hei hi a tangkai hle niin a sawi bawk.