Aizawl : Zomi Council Steering Committee hruaitute’n Inrinni khan Chief Minister Zoramthanga chu a pisaah an kawmin, tunhnai mai ni lo, hun rei tak ata tawh Manipur zofate tana a lo thawh tawh thinna zawng zawngah lawmthu an hrilh.
An inkawmnaah Zoramthanga hian Zomi Council Steering Committee hruaituten an ngen angin an kal zel dan tur thurawn hrang hrang a pe a. Mizoramin inthlanpui a hmachhawn dawn avangin engkimah lo tanpui nghal zat zat a harsa palh thei a, amaherawh chu mipuite mamawh an tihsak theih awm apiangte chu theihtawpin sorkarin a ngaihtuah dawn thu leh a tul anga be pawp zel thin turin a chah.
Zomi Council Steering Committee-te hian, buai tirh phat atangin an mamawh engkim Mizoram atangin an chawlut vek a, mipui mamawhte tluang taka an lak theih nan Mizoram sorkarin Tuivai lei a siamthat sak a, Daido lam kawng a chei sak a, Hliappui atanga Kawlkulh kawng siamthatna a ruahman bawk a. Mizoram mipuiten an hmangaih em em a, media hmun tinrengah an tanpui a; Mizoram MP pahnih C. Lalrosanga leh K. Vanlalvena ten an tan parliament-ah theihtawp an chhuah reng bawk avangin an lawmin, an thla a muang a, lawmthu an rawn sawi tiin an hmuh chhan ber an sawi.
Zomi Council Steering Committee te hi an leader T. Kaithang hovin an rawn kal a ni.
Inrinni chawhnu khan Zomi Council Steering Committee-in Aizawl Press Club-a MP K Vanlalvena hmuahna inkhawm buatsaihah chawimawina Zomi hnampuan an bah tir.
Zomi Council Steering Committee hruaitute chuan baihvai taka an awm laia, parliament thlenga nu leh pa chan saktu MP K Vanlalvena chungah an lawmzia lantirna’n leh chawimawinaa Zomi hnam puan bah tir an nih thu an sawi.