Commerce & Industries Minister Dr. R.Lalthangliana chuan Inrinni zing khan New Market, Aizawla Bazar building sak mek tlawhin, hmalak tawh chin leh hmachhawpte a enfiah.
New Market a tlawhnaah Dr. R. Lalthangliana chuan hripui leng avanga harsatna leh inkhuahkhirhnaten kum hnih lai hna a tih khaihlak phah thu leh hemi avanga tum ang huna bazar sak hna zawhfel hman a nih loh thu a sawi a. Contractor-te chu hna tlo leh tha, ram leh hnam tana rotling sa zo thuai thei tura chak taka thawk turin a hrilh.
Bazar building sak hna thawktu Contractor leh MIMA hruaitute kawmin, mamawh leh tul an thlente bawhzui dan turte a sawipui a. Heng bakah hian building sak mek avanga sumdawng leh mipuiten harsatna an tawhte sawipuiin a hmunah a enfiah bawk a; chinfel dan turte a sawipui nghal bawk.
Dr R Lalthangliana chuan MIMA office bula varandah chu MIMA hnenah chei phalna a pe a. MIMA office hi Minister kaltlang hian department hotute nen inremna fel tak siama MIMA hi sak tir a ni.
AMC Executive Corporator Lalawmpuii pawhin MIMA office-a dah tur plastic chair 30 a pe nghal bawk.
New Market Aizawlah hian bazar building sak mek hlawm hnih a awm a; Commerce & Industries Department hnuaia cheng nuai 3641.59 senga sak mek, Aizawl City Centre Annexe (ACC Annexe) leh Aizawl Smart City Project, UD&PA hnuaia cheng nuai 4159.03 senga sak mek, Aizawl City Centre (ACC) te a awm a. Aizawl City Centre (ACC) hi Smart City Project hnuaia thawh a nih angin ruahman dan chuan June 2024 a zo hman tura beisei a ni a, Aizawl City Centre Annexe (ACC Annexe) hi January 2024 a zo hman tura beisei a ni.