Real Madrid chuan Spain goalkeeper Kepa Arrizabalaga chu Chelsea atangin season tluan atan loan in an hawh.
Kum 28 mi hian Madrid a number one goalkeeper Thibaut Courtois inhliam laiin a hmun ruak a luah dawn a. A khup hliam avangin Courtois hian tun season hun rei zawk a inkhel thei dawn lo.
Kepa hian kum 2018 August khan Athletic Bilbao atangin Chelsea hi a zawm a. Pound maktaduai 71 man niin a hunlai a goalkeeper manto ber a ni.
Blues tan hian vawi 163 a inkhel tawh a. Nimahsela tun nipuiah Robert Sanchez an lakluh avangin Chelsea hian chhuahtir rih an pawi ti lo.
Pound maktaduai 25 man Sanchez hian Pathianni zan khan inkhel bul a tan a. Chelsea-ah hian Kepa elpui thin Senegal international goalkeeper Edouard Mendy chu tun nipuiah Saudi Pro League lamah hralh a ni tawh bawk.
Kepa a chhuah avang hian Blues squad-ah hian Sanchez tih lovah goalkeeper tawnhriat nei chu kum 31 mi Marcus Bettinelli chiah a awm mek.
Hetihlai hian Real Madrid defender Eder Militao chu Inrinni zana a inhliam nat zawng hriat a ni tawh a. A khup hliam zai a ngai dawn a, kumin chhungin a inkhelh leh hman a rinawm tawh lo.
Militao a inhliam vang hian Carlo Ancelotti-a’n centre-back fit pathum – David Alaba, Antonio Rudiger leh Nacho te chiah rin tur a nei dawn.