Aizawl: Lamka, Churachandpur-ah ram chhung hmun dangte rualin nimin khan India Independence Day vawi 77-na lawmna neih a ni a. He hun hmanpuitu khuallian, Central YMA President R Lalngheta chuan khawvel hmun hrang hranga Zohnahthlakte inpumkhatna leh inlungrualna tichhe zawnga mi mal leh hruaitu bawra lansarh duhna paihthlak a hun tawh a. Chumi ti phal lote lakah tangruala endawng a tul tawh thu a sawi.
Mawltual, Lamka-a hun hmanah R Lalngheta chuan India sorkar leh Manipur sorkarin Zo hnahthlakte a enkawl danah duhkhawp a tling lo a. Chuvangin mi tam takin nunna an chan a, hliam tuar tam tak an awm a, nunna chantute zawng zawng pawh an tawrhpui a, an kalsan tak an chhungte leh Zo hnahthlak zawng zawngte Pathianin awmpui se la, hliam tuarte pawh an dam leh thuaina turin an tawngtaipui thu a sawi.
Central YMA-in a duh ber chu khawvel hmun hrang hranga Zohnahthlak awm te, British sorkar ramri avanga a dah hrante hi unau an ni tih hre thar zela inpumkhatna tha leh thuk tak, thisen zawm khat nihna neih thar a nih thu a sawi a. “Lamka chhunga chengte pawh tumah inenhrang loa unau kan ni tih hriaa a chi bil leh hnam bil anga kal loa Mizo hnam kan nihna chianga, inlungrual taka kal turin ka duh che u a. Chumi ti thei lote lakah chuan kan tanruala kan endawng pawh a ngaiin ka hria. Chuvangin kan inlungrualna, inpumkhatna, inzawmna zawng zawng dal thei tur hi paihthla turin mipui te ka sawm a ni,” a ti.
“Kan nghahhlelh em em, rorelna hrang (Seperate Administration) hi nei tehreng pawh ni ila, tun dinhmunah chuan rorelna hrang neih karah keimahni leh keimahni hi kan indo nghal ang tih hi a chiang reng a. Chu chu Mizoram atanga pawha kan lo thlirna a ni a. A hmunah pawh keini aiin in chiang dawn,” tiin, Zo hnahthlak te chu inpumkhat a tul thu a sawi.
R Lalngheta chuan Zo hnahthlakte inzawmkhawm hi mipuiin pawhin an duh; mahse, hruaitu bawrah eng emaw avang hian an la phal rih lo mai mai nia a hriat thu sawiin, “Chuvangin, sahthlak tur hruaitu zingah kan nei a nih pawhin sahthla ila. Nang leh kei hi khawvel mithmuna kan dinchhuah theihna tur chuan keimah a pahnihnaah indah a, hnam hi a pakhatnaah dah ngam a tul,” tia sawiin, chutiang ti phal lo a, mihring ropuina um avanga unau nihna pawh inhre hleithei lo, inhmangaih hleithei loa Zo hnahthlakte awm tirtu chu engdawng a, hnawl ngam turin a chah.
Manipur chhunga Zo hnahthlak zawng zawngte hi mihring lam thlirna atang chuan inzawmkhawm thei lo angin lang mah se, Pathianin hna a thawh a, tute pawh an tlawm nawn a, an inthuhruk ngam phawt chuan Zohnahthlakte an inpumkhat thei dawn tih sawiin, “Zomi kan ni emaw, Hmar kan ni emaw, Lushei tawng hmang kan ni emaw, tute pawh ni rawh se. Vawiinah chuan unau thisen zawmpui, chhul khat kual kan nihna, chhin lung chhuak kan nihna hriain, he buaina kan tawh hi inpumkhat nan hmang ang u,” tia sawiin Central YMA president chuan, tun hmaa hnam bil leh chi bil anga kalpui, culture anga neih tawh hi paihthlain, rap ber ngamin Zohnahthlak zawng zawngte inpumkhatna din thar tur leh Zohnahthlakte inpumkhat hi Meitei te hlauh ber a nih thu a sawi bawk.
Mizoram atanga tanpuina lutte hi tute pawhin dawng se, thik mai loin inlawmpui thiam tura chahin R Lalngheta chuan, “Tanpuina kawngah chi bil leh hnam bil angin tute pawh kan en hrang lo a, puih ngai nia kan hriatte hi kan thiam leh theih ang tawkin kan pui mai a ni a. |anpuina kan dawnte pawh inlawmpui thiam turin ka sawm che u a ni,” a ti a ni.