Canada chuan a ram chhung, British Columbia ram kang mek inman kai chak tak thelhnaa thawk ve turin sipai a tir dawn tih Prime Minister Justin Trudeau chuan Pathianni khan a puang a. Khawthlang province-ah hian ram kang 400 dawn awm mekin chhungkaw 35,000 chuang insaseng tura hriattir an ni tawh.
British Columbia-ah hian Zirtawpni khan emergency puan a lo ni tawh a, kang thelhtute leh mahni in atanga chhuah ngaiten awmna tur hmun ruak an neih theihna turin tul lova zin luh khap a ni bawk a. Drone khalhtu leh thla la thinte pawh chhanchhuah hna thawh tibuai zawnga awm lo tura tih an ni bawk.
Trudeau chuan British Columbia sorkar-in a ngen angin sorkar laipui chuan mi thiar chhuah leh kangmei beihna kawngah puih a tum a, a sipaiten a tir dawn tih X-ah a tar lang a ni.
Canada hian ram kan hun lai (wildfire season) tawng mekin a nasat ber tum a ni mek bawk a, Northwest Territories province bul hnaiah ringawt pawh hmun 200 dawnah a kang a ni.
British Columbia-a khawpui thenkhatah chuan air quality index (AQI) pawh a sang hle a, meikhu avangin 350 chuang niin mihring tana hlauhawm tak a ni tling.
West Kelowna fire chief Jason Brolund chuan ni li chhung rim taka an beih hnuah beiseina an nei thar tan tih a sawi a. An dinhmun chu tlemin a ziaawm hret niin a sawi a, tui hnaiha kangte chu a ziaawm niin a sawi a, mihring 1,50,000 chennaah hian beiseina thar an nei tih a sawi.
“Tunah chuan hnungtawlh lovin hma lam kan pan tan niin kan inngai a, hmasawnna ropui tak a ni,” tiin Brolund hian Canadian Broadcasting Corporation hnenah a sawi a ni.
Canada-ah hian ram kang hi thil thar a ni lem lo va; mahse, tun hnaiah a kang nasain a huam chin pawh a zau sawt hle a, mi thiamte chuan sik leh sa inthlak nasa chu an puh ber.
Canada-ah hian sorkar thuneitute chuan inthiar chhuak tura tihte chu rang taka chhuak turin an nawr a, hei hi anmahni an himna atana tih a ni a, an chhuah thuai lohva a hnua chhanchhuah an ngaih leh tho chuan thawktute nunna atana hlauhawm leh inchânna thlen thei an ven lawk vang a ni.
Thuneitute hian in eng zat nge kang chhe tawh an la sawi lo va. Social media-a video leh thlalak darhah erawh in bakah lirthei a chhe nasa hle tih a hmuh theih a, ram kang khu chhah takin thing a bawh pawh a tam hle bawk.
Canadian sorkarin a enkawl, Trans Mountain pipeline leh a huang zauhna tura hna thawh mek, Pacific vaukam atanga British Columbia thleng kal tur erawh tun tum ram kang hian a khawih pha lo hlauh niin Pathianni khan company thupuangtu chuan a sawi.
Pipeline zawm belhna zingah hian Kamloops chhimthlanga awm, Coquihalla chu a teuh ber lai a ni.
Ram nasa taka kang mek hian tual chhungin a tihtheih tawp a chhuah tawh bakah sorkar laipui pawhin thawh chhuah a tum ta a. Ram dang 13 atangin puihna an dawng tawh bawk a. Tun thleng hian kang thelhtu mi pali an thi tawh a ni.
Ram sq km 1,40,000-a zau, United States-a New York state pum zau zawng ang vel a kang chhe tawh a, a khu ringawt pawhin US khawchhak lam vaukam a thleng tawh a. Sorkar hotute chuan ram kan hun hi favang thleng pawh a ni thei dawn niin an sawi a, hei hi khawkheng ang maia ruah tui an dawn tam loh vang a ni.
Mi thiamte chuan khawvel puma sik leh sa inthlak nasa avangin khaw awm dan uchuak tak tak a tam telh telh dawn niin an sawi lawk hrim hrim a. Ruah sur nasa, khaw lum uchuak, vawt uchuak, thlipui na tak tak a tam dawn niin an ngai a. Khua a lum leh vawh pawhin a hun chhung a rei zel tawh dawn niin an ngai bawk.
Sik leh sa inthlak nasa lutuk tihziaawm nan hian khawvel ram tam takin tan an la mek bawk a; mahse, ram tam takin khawvel tilumtu ber, carbondioxide an tihchhuah zat tihtlem an tum a, intiamna pawh an nei hlawm bawk a; mahse, ram tam tak chu an tum angin an awm thei mai rih lo thung.