Aizawl: All India Congress Committee (AICC) hruaitu eng emaw zatin nimin khan Mizoram an thleng a. MPCC Office Bearer-te nen inkawmin, he hunah union minister hlui, AICC (i/c Mizoram) Bhakta Charan Das chuan I.N.D.I.A din a nih chhan chu sakhaw zalenna duh vang a nih thu a sawi.
Das chuan India ram puma MP inthlan nakkuma neih turah Congress party leh a thawhpuiten Hindu lal ram din tumtu, BJP sorkar paihthla ngei turin I.N.D.I.A an din tih sawiin, “India ram puma sakhaw zalenna duh vang a ni,” a ti.
BJP-ten India ram hmun hrang hrangah Hindu lalram a pian theih nan hma an la mek tih sawiin Das chuan, “A bik takin hmarchhak lamah hma an rawn la nasa hle a. Mizoram pawh a tuar mai thei dinhmuna ding zinga mi in ni. Chuvangin, BJP sorkar hi sakhaw tenau zawkte tan a him lo a ni,” tiin, Mizoram mipuiin khua a tlai hmaa ngaihtuahna thar an hmana kum 2024 central inthlan huna sorkar mai tur Congress party leh a thawhpuite hi MLA General Election 2023-ah pawh thlan tlin ngei a ngai tih a sawi.
Das chuan Mizoramah Congress party hmalaknaa sakhaw zalenna duhtu pawl Mizoram Secular Alliance (MSA) din a ni chu lawmawm a tih thu sawiin, “Ram leh hnam chhanna tak tak, sakhaw zalenna ngaihtuahtu, Congress party leh a thawhpuite hi lo vote tling ngei turin Mizoram mipui ka sawm che u,” tiin, BJP leh a thawhpui party-te hi hnawl ngam a ngaih thu a sawi bawk.
August 26, 2023 hian AICC hruaitute hian Delhi an pan dawn a. Mizorama an châm chhungin MPCC hruaitu hrang hrang te, Kohhran hruaitu te leh NGO hruaitu te kawm an tum a ni.