United States-a Tennessee state-a tui lian vangin mi 22 vel an thi a, mi eng emaw zat an chin hriat lohvin an awm mek bawk.
Chhanchhuah hna thawktute chuan Nashville thlang chiah, thingtlanga Humphreys County-ah mi 50 chuang chin hriat lohva awmte an zawng mek.
Record tling hial tui lian thut hi Inrinni atanga intan kha niin kawngpui a chim vek a, telephone leh power line a chhe vek bawk.
Emergency worker-te chuan a tuar na zual hmunah chuan in tin an lut lawr a, chhanchhuah hna thawktuten tuiin a len chhiat in senghawi hna an thawk mek bawk.
Chin hriat lohva awmte hi Humphreys County-a emergency centre notice board-ah an hming tar a ni a, an chhungten an chanchin an ngaihven reng bawk.
County-in an Facebook page-ah chin hriat lohva awm an thiante leh chhungte chin hria an lo awm hlauh chuan hrilh zel turin an ngen bawk.
“Ka vahnu tuiin a la,” tiin hmeichhe pakhat chuan a tar lang a. “A chhungten an zawng mek a. Miin an hmu tih an sawi a; mahse, amah a lo ni si lo,” a ti.
Mi dang pawhin, “Ka chhungte nen ka unaunu (cousin) kum ruk mi kan zawng nasa hle a. A chin hria chuan min lo hrilh rawh u,” a ti bawk.
Bo tam ber hi Waverly khuaa mite an ni a. Governor Bill Lee chuan Pathianni khan a tlawh.
“Nunna chân leh thil chhiate hi a rapthlak hle a. Chânna leh rilru hrehawm taka awm kan Tennessean-puite thinlungin a hre reng a ni,” a ti.