Season liamta ah an elpui ber an ni a, kuminah erawh inel tak tak turin an pha lo hle. Heti chung hian Ferrari team principal Fred Vasseur chuan fal taka championship hmahruaitu Red Bull nena an inkar chu a zau lova, mahse kawng hrang hrangah hmasawn leh deuh an mamawh tih a sawi.
Ferrari hi season liamta khan Red Bull Racing nen an tha fal a, amaherawhchu team in tihsual an neih leh thin leh an car in harsatna avanga tlan zawh theih loh a neih leh thin avangin season tawp lamah an el pha lo.
Kuminah erawh constructors’ championship-ah Ferrari hi palina an ni mek a, Red Bull balah Mercedes leh Aston Martin te hnuaiah an awm.
Azerbaijan leh Belgium-ah te qualifying-ah pole position chang theiin an car set up a fuh a, tlanna hmun nen a inmil tum chuan an tlan chak thei tih a chiang. Mahse intlansiak vawi 12 atang dawhsanah vawi thum chiah an lan theih avangin beisei ang season an hmang lo.
Vasseur chuan, “Hmasawn kan ngaihna hi thil pakhatah chauh a ni lo, Red Bull hi kawng hrang hrangah an tha em em vek. Keini aiin an tha viau a ngaih erawh a fuh ber lo, kan inthlauhna hi a tam lova, mahse kawng hrang hrangah a ni.” tiin a sawi.