Chief Minister Zoramthanga hovin nimin khan Mizorama mau sawngbawlna kalpui dan tur Mizorama mau sawngbawlna industry neitute nen an sawi ho.
CM Conference Hall-a thutkhawmah hian National Bamboo Missions leh Asian Development Bank te tangkawpin Northeast India state pangaa mau sawngbawlna tihhmasawnna tur hmalakna a kalpui tur, Bamboo Value Chain Development-in Northeast, Mizorama kalpui dan tur an sawi ho a. Thutkhawm kaihruaitu CM Zoramthanga chuan, tun hma deuh atangin Mizorama mau behchhan industry ten furniture lam an hawi deuh vek a. Mahse, mau neih sate hi an lo tet deuh avangin chutiang atan chuan a lo hman tlak vek chiah si loh avangin harsatna an tawk ta niin a sawi.
Zoramthanga chuan tuna National Bamboo Missions leh Asian Development Bank tangkawpten hma an lakna tur bikah hi chuan Pathianin Mizorama a dah sa maute hman tangkai dan ngaihtuah a nih thu a sawi a. Anmahni ngeiin Mizoramin mau neih sate hmang tangkaia, a hralhna awm si an hria emaw, India ram chhung leh ram pawna company lian zawkte nena thawh hona mumal tak an kalpui thei dawn a nih chuan sorkar chuan theihtawpin a thawhpuiin a tanpui dawn tih a sawi.
Thutkhawmah hian industry kalpui mektute chu Mizorama mau awm sa hmang tangkai tura ruahmanna an neih te a rang lama theh lut tura tih a ni. Finish Product emaw Semi-finish product ang emaw pawh leng vekin company lian zawkte koh luh leh thawhpuina lam hawi pawh; a hralhna lama harsatna awm lo tur mau hman tangkaina eng chi pawh rawt turin an rel bawk.
Thutkhawmah hian Dr. K. Pachhunga, MLA, Vice Chairman, Bamboo Development Board leh sorkar mi pawimawh dangte bakah mau behchhan industry panga aiawh hotute an tel a ni.