Aizawl: Ram chhung hmun hrang hrang rualin nimin khan Aizawlah Rozgar Mela hman a ni a, Union minister of State for Minority Affairs John Barla-a’n Central Armed Police Forces (CAPF) hnuaia hna hmu thar Mizo thalai mi 68 hnenah appointment letter a sem.
Assam Rifles buatsaiha 2nd AR Gajraj Hall-a Rozgar Mela/Job Fair neiha khuallian , Barla chuan ram venhim leh rawngbawl hna thawk tura pen chhuak, hna hmu thar thalaite chu mawhphurhna an neihte hrilhfiahin ram leh hnam tan theih tawp chhuah turin a fuih a. Ram leh hnam chakna leh thiltihtheihna mi tin kutah a awm thu sawiin, hmasawnna rualkhai tak khua leh tui tinten an neih theih nana hmalak chu sorkar laipui ngaih pawimawh a nih thu a sawi.
Union minister chuan sorkar laipuiin mi rethei chawikanna tur scheme hrang hrang a neihte chu Mizoram mipuiten hmang tangkai se a duh thu sawiin, “Mizo mipuiten heng scheme-te hi hman tangkaina chang an hriat a tul,” a ti a. Tunlaiah mi tinin smart phone an hman tawh thu te, mahni awmhmun atangin an tana tha tur thil tam tak hai chhuah theih a nih tawh thu a sawi bawk.
Rozgar Mela hi thalai hna nei loten hna an neih theih nana Prime Minister Narendra Modi kaihhruai sorkar laipuiin a kalpui a ni a, nimin khan state hrang hrang 25-a hmun 45-ah huaihawt a ni a. He hunah hian sorkar laipui hnuaia department hrang hranga hna hmu thar mi 51,000 chuang hnenah appointment letter pek chhuah a ni.