Aizawl District Basketball Association leh LPS Vision Production chuan tun season chhung thawkho turin inremna an ziak fel a, pawtsei thei zel turin inremna an siam tel nghal.
Thawhtanni khan LPS Park, Falkland Vengah Aizawl District Basketball President Dennis Vanlalmawia leh LPS Vision Director Lalsawmliana Pachuau chuan hming an ziah hnan ve ve a. An inremnaah hian thuthlung panga awmin kum khat atan ni mahse ennawna thawk dun zel thei turin thu an dah tel nghal a ni.
Aizawl District basketball-in tournament lian a siamin LPS Vision-in quarterfinal emaw aia hma emaw atangin live-in a pe chhuak thin dawn a, tournament lian ni lo inelna dangah a hranpain an indawr tha leh ang.
LPS-in TV rights a neih theih dan tur leh ticket, advertisement leh sponsorship chung-changah pawl pahnihin chanvo an neih dan tur an ziak tel nghal baw.
Aizawl District hruaitute chuan basketball tihlarna leh tihhmasawn nan hma lakna pawimawh tak niin an hria a, season kal mekah awmze nei zawka tournament buatsaih thei tura LPS nen an thawh dun theih avangin lawmawm an ti hle.