Tlem zawk ni chungin hun tam zawk an hmang a, mahse mikhual team Liverpool an zam chuang lo. Newcastle United in sum ngah mahse hlawhtlinna tawngbaw tawh team rilru puthmang a dang a ni tih a lang. 2-1 in Liverpool in an khingpuite an lehthal.
Pathianni zanah St. James’ Park-ah first half-ah team nawi zawk an awm, chu chu Liverpool an ni. Mikhual team hi Newcastle United in an chaih phar nasa a. English winger Aaron Gordon chuan Reds right-back chhuanvawr Trent Alexander-Arnold a ti rethei hle a. English full-back hian yellow card a hmuh hnu lawkah Gordon hi chiang taka foul hi hnawhchhuah a ni lo chu a vannei.
Minute 25-naah a tihsual atangin Gordon-a’n Newcastle United goal a khung a. Magpies in hma an hruai mai a ni lo, Liverpool tlarhnung phui loh danah goal khung belh mai tur an ang zawk.
Reds buaina belhchhah turin captain Virgil van Dijk chuan Aleksandar Isak a ti tlu a, ‘goalscoring opportunity’ a nih avangin hnawhchhuah a ni. Liverpool captain in thutlukna a sawisel nasa, khelmual a chhuahsan lawk loh avangin a chetdanin sawisel a hlawh tel.
Reds goalkeeper Alisson-a’n Miguel Almiron goal khung tur tha tak a dansak a, a team chhandam turin save a siam nual.
Almiron-a’n goal khungna remchang a hloh thin a uiawm a, halftime-ah 1-0 chauh a ni chu Liverpool an vannei.
Second half-ah pawh a tir lam a danglam lo, mahse coach pahnihte thutlukna in inkhel a thlak danglam chiang hle.
Jurgen Klopp-a’n tha thar, rang zawka an khelh theihna turin Harvey Elliot leh Diogo Jota a dah lut a, awmzia a nei nghal. Lehlamah Eddie Howe-a’n inkhel kaihruaitu Sandro Tonali leh Liverpool ngam loh Gordon a la chhuak chu a ti fuh lo. An zuih ral phah a ni deuh ber.
Substitute Darwin Nunez-a finishing sawisel a ni thin, tun tumah erawh a team chakpuitu a ni. Minute 81-na leh 93-naah remchang a hmu a, a hloh lo ve ve.
“Kum 2020 a Barcelona laka kan comeback aiin a harsa zawk. Goal kan chhuah hma bakah red card kan hmu. Mahse second half-ah kan kheltha a, halftime a kan beiseina neih kha kan chhawm tluan zak a ni.” tiin Klopp-a’n a sawi.
City chakna Rodri
Premier League champion Manchester City in nidang an pha lo chungin hnehna an chang a, huntawp dawna Rodri goal khung hmangin Sheffield United 2-1 in an hneh.
Bramall Lane-ah City in first half-ah goal an khung thei lo. Striker Erling Haaland chuan penalty ah goal ban a pet per.
Mahse second half-ah Jack Grealish cross a tauh lut a, 1-0 in hma an hruai. Blades in minute 85-naah Jayden Bogle hmangin an si phurh an sut a. Point an hawn dawn niin lang hman mahse minute thum hnuah Spain midfielder Rodri-a’n an chakna goal a khung.
City hian kum 2016-17 season hnua a vawikhatna atan season bul tanna inkhel pathumah hnehna an chang vek a ni.