August thla liam tura India rama ruahtui tla chu a nih dan thin pangngai aiin 26% velin a tlem a, thla zawna a nih dan tur ang a phak lohna niin tun furpuia ruahtui tla a nghawng phak rin a ni.
India Meteorological Department (IMD)-in a chhinchhiah dan chuan July khan a nih dan pangngai aia 7% velin a tla tlem tawh.
“August 28 thleng khan August thlaah pawh hian 26% zetin a nih dan ang tur a phak lo,” tiin IMD Director General Mrutunjay Mohapatra chuan a sawi a, a bikin hmar lam leh India laili-ah a tla tlem niin a sawi a. June thlaah khan 10% velin a tla tam thung tih a sawi bawk.
IMD chuan September an thlirlawkna an tichhuak tep tih a sawi bawk.
India-ah hian June 1 leh September 30 hi furpui hun niin thla li chhung a ni a, thla hnih a zawna ruahtui a tlak tlem tak avang hian kumin fura ruahtui tla hi a nih dan tur ang a nih phak loh a hlauhawm ta hle nia ngaih a ni.
A hma hian IMD chuan kumin furah hian kum dang anga ruahtui tla thin ang pangngai zat a tlak tur thu an lo sawi lawk tawh.