Kan tunlai khawvel hi a inpawh vek tawh a. Nihnih khat thilah khawvel letliam America kan thleng a. Thlen phak ngai loh tura ngaih Japan ram pawh kan thleng zung zung a. Engkim mai thil thleng pawh minit tinin kan inhre pawh tawh a. Hnathawktute pawh mahni loa feh thin hnam kha khawvel letliama mi hnena thawkin kan in hlawh tawh a. Ram hnufual leh retheite tan pawh ram hausa zawkte rama hna thawka inhlawhna kawng a lo awm ta a. Ram rethei apiangin hausa zawk ram kan pan nasa a. Innghah nan kan hmang hlawm a ni.
Chutiang khawvel kan hman avang chuan keini mizote pawh ram rethei kan nih avangin kan vak darh ve tan a. Kan ramah hna a tlem avangin ram hla tak takah mi hnena inhlawhin, hrehawm tinreng tuarin kan thalaite an kal dawr dawr a. Hlawhtling taka nu leh pa in leh lo, khawsak dinhmun thlenga siamtha pawh tam tak an awm ta. Hetiang thalai engemaw zat kan nei hi lawmawm takzet a. A kalkawng hre fuh laklawhte hnung zuia vakchhuak ve a harsatna tawk ta pawh an awm nual bawk. Hlawhtling tam tak karah vanduaina tawkte hi buaipui an ngai takzet thung thin.
Kan ram retheihna avanga kan thalai ram danga inhlawha vakchhuakte pawh kan ram tana sum hailuttu an nih avangin kan sawrkar hotute pawhin an fakin an lawm hle thin anih kha. A nihna takah chuan kan rama kan sawrkar hrawnte hian ram hmasawnna lama ke min pen pui hleih theih loh avanga vakchhuak an ni a. Hengte hi chawimawi tur pawh an ni reng a ni.
Amaherawhchu khawvel ram tin hian ram inenkawlna dan kan nei vek a. Kan rama hnathawka rawn awm tur emaw, ram pawna hnathawk tur emaw enkawlna dan hi kan duang vek a. Heng dante hi mi rama hnathawk tur chuan kan hriat a, keimahni himna leh hlawkna turah kan chian a ngai hle. Kan thalai tam tak hian ngaihtuah chiang mang lova, a hlawk e tih vanga tawngpawng zuan ngawt kan ching hi chu a fuh chiah lova. Harsatna tam takah kan inbarh lut fo mai. Kan zuanluhna tur hi uluk taka zirchian hmasak a, a him leh him loh kan en uluk hmasak fo hi lan kalphung tur a ni. Tunhnaiah pawh thalai tam tak chu an talbuai a. Mahni ramah pawh kir leh hleithei lovin, manganna tawpkhawk tuarte pawh an awm nual. Mi thahnemngaite buaipuina zara talchhuak leh hrama mahni in leh lo thleng thei hram pawh an awm bawk.
Ram hausa a inhlawh hi ram retheite chuan kan ti lo thei lo a. Chungah chuan kan ram hruaitute hian kan thalaite kalchhuak, la kalchhuak leh zel turte kalphungah kan sawrkar hi a inrawlh a, an himna kan ngaihtuah hi kan tih tur a ni a. Kan tu leh fate tan kan khawtualah eizawnna kan ngaihtuah sak thei lova. Ram hla zawka ei an zawn a lo ngai ta a. Thalaite hi ngaihtuahna thui tak nei lo zawk an ni tih hi nu leh pa dinhmuna ding sawrkar chuan kan hriat a hriat a. An kal na tur a him em tih kan ngaihtuah a, Vil zui reng hi kan sawrkar mawhphurhna pawh a ni bawk. Mimal tin nunah nitinin enfiah vek thei lo mah ila an kalphung tur danah kan fimkhur pui an ngai a. A ngam an kal ani mai tih gawt a duh tawk mai lova, an kalchhuah hmaa lo buaipuituten an buaipui dan a dik em tih hi te hi kan hriat vek a ngai. Mawhphurhna mahni kuta inbelin buai an awm pawhin emgvanga buai nge an nih? Khawi hmunah nge an buai, An buaina chu engtinnge kan chinfel ang. Enfel ngai a tam.