Madrid khaw club lian dang zawk Atletico in an thenawm club lakah hnehna chiang tak an chang a, 7-0 in Rayo Vallecano an hneh.
Thawhtanni zana Estadio de Vallecas a La Liga inkhelah hian Rojiblancos tan substitute Álvaro Morata chuan goal hnih a khung a. Midfielder Saul Niguez leh Rodrigo de Paul ten midang goal khung tur vawi hnih ve ve an siamsak.
Diego Simeone pawlte hian minute 2-na leh 16-naah Antoine Griezmann leh Memphis Depay hmangin goal hnih an khung nghal a. Halftime hma in Nahuel Molina chuan an goal thumna a khung.
Second half-ah inhliam Depay thlaktu Morata in goal hnih a khung a. Angel Correa leh Marcos Llorente ten goal an khung bawk a. Tun season-ah game thum atang vawi hnih an chakna a ni.
Atletico forward Griezmann chuan, “Kan kheltha tak zet. Nuam ti takin kan khel a, a tir atangin kan inthlahdul miah lo bawk.”
“Goal kan khung hma khan kan rilruah thlamuanna a siam a, ngaihngam takin kan inkhel zui a, point thum pawimawh tak kan hmu a ni.” tiin a sawi.
Thawhtanni inkhel dangah Madrid khaw club dang Getafe chuan 1-0 in Deportivo Alaves an hneh a. Huntawp dawnah Borja Mayoral chuan penalty atangin goal a khung.