India chuan Taliban kuta Afghanistan a tluk hnua a vawi khat nan ram pahnih inkara palai inbiakna a kalpui ta.
United States sipaiten an chhuahsan mek laia Afghanistan thunun thar lehtu, Taliban aiawh hi Thawhlehni khan Qatar-a Indian palai nen Doha-ah an inkawm.
India nena inkawmna hi ram buai tak thunun mektu hel pawlten an ngenna anga neih a ni.
Qatar-a India palai, Ambassador Deepak Mittal chu he rama Talivan Political Office-a an hotupa, Sher Mohammad Abbas Stanekzai chuan a kawm niin external affairs ministry chuan a sawi a. Indian Embassy-ah an inkawm niin thuchhuah a siamah a tar lang bawk.
India thuchhuahin a tar lan dan chuan Afghanistan-a helho an pun leh chiam hlauhthawn a ni chu Stanekzai chuan a tha zawngin thil a kal zawk dawn tih a sawi.
“Himna, venhimna leh a hma thei anga Afghanistan-a Indian la tang mekte lak chhuah dan chu an sawi bulpui ber a ni a. Afghan mi, a bikin hnam leh sakhaw zuitu tlem zawkte, India-a kal duhten awlsam zawka an kal theihna turte pawh an sawi bawk,” tiin thuchhuahah chuan tar lan a ni.
“Ambassador Mittal chuan Stanekzai-a hnenah hian India chuan Afghanistan chu Indian dona lam thil tih nan leh firfiaka chetna lam chi a awm lohna tur chu a duh ber a nih thu a hrilh,” an ti.
India hian a hmain Afghanistan-a thil thleng mek chungchangah hian political party tin aiawhte kokhawmin a lo sawiho tawh a. Thil thleng chu nghaha a nih tur ang nihtir phawt an lo rel tawh a ni.