Aizawl : Aizawl West III bialtu MLA VL Zaithanzama chuan Mizoramin infiamnaah hma a sawn an tih rualin, infiamna kalpui danah erawh duhkhawp lohna sawi tur a tam tih a sawi.
Nilaini zana Aizawl West III MLA Constituency huam chhunga Local Council hrang hrangte tana Futsal Tournament neih zawh taka kharna inkhawm a hmanpuinaah VL Zaithanzama chuan, hmun tinah phul lem phahin infrastructure ropui tak takte din ni mah se, Sports-a budget erawh tihpun a ni ngai lo tih sawiin, “Budget beitham tak nen kum min liampui reng thin hian infiammite sorkarin a ngaihsak tawk loh zia a lang,” a ti.
VL Zaithanzama chuan, “Stadium sakte, phul lem phahte, infrastructure tha tak tak dinte hi kan sawisel lo. Amaherawh chu, hengte hi sum siamna mai a nih chuan Sports hmasawnna tak tak kan hawi thei dawn lo a ni,” a ti a. India ramah state len zawng emaw, mihring tam zawnga chhutin phullem ngah ber ni hial mah ila, India hmarchhak huap inelna lian North East Olympic Games-ah pawh Mizoram chu a mualpho nasa hle niin a sawi.
Aizawl West III bial huap Futsal Tournament-ah hian Mission Vengthlang an champion a, Rs 20,000 leh trophy an dawng a ni.