Aizawl: Serchhip district-a hmasa ber leh a awmchhun, high school leh higher secondary school-a hmeichhe zirlaite a thlawn veka an awmna tur, Netaji Subhas Chandra Bose Avaslia Vidhyalaya Secondary Hostel (NSCBAVSH), Thenzawl Vengchhaka mi chu nimin khan Serchhip District Education Officer Lawmawma, District Project Coordinator, Samagra Shiksha ni bawk chuan a hawng.
Hawnna Inkhawmah Lawmawma chuan high school leh higher secondary school zirlai hmeichhe naupang tana hmalakna hi Samagra Shiksha atanga ruahman a nih thu a sawi a. A tul dan azira hostel tam zawk nei thei tura hma an lak zel thu a sawi.
Serchhip DEO sawi danin hostel-ah hian seat 30 awmin seat khat hi mamawh zualte tana reserve a ni a. A awm tur naupang pakhat tan Rs.1,000 security deposit-ah dah a ngai a. Hei hi lak let leh theih a ni.
NSCBAVSH Hostel hawn takah hian Thenzawl leh a chhehvel khuaa high school chin chung lam hmeichhe zirlai 29-te chu vawiin atangin hostel-ah hian an lut dawn a, zirlaite hian ei leh in bakah mutbu leh an mamawh tul dangte a thlawn vekin an dawng dawn a ni.
Tun dinhmunah Warden hovin thawktu mi pasarih an awm mek a ni.