Agriculture Minister C Lalrinsanga chuan Mizoramin buh a mamawh zat hmun thuma thena hmuh khat chu Mizorama thar a nih thu leh, buh thar tam tur hian lei let laih zau belha hma lak a nih thu a sawi.
Ningania Aizawl Press Club-a thu thar thehdarhtute a kawmnaah C Lalrinsanga chuan duh anga buh thar tam a harsat chhan chu buh hmunpui tharna hi Mizoram lei lungin a zir loh vang a nih thu a sawi a. Mizoram chu buha intodelh thei a nih thu sawiin, MNF sorkar kal lai mekah hian buh thar tamna tur atan hian ram hactare 484 chu lei let atan laih zawl a nih thu a sawi.
C Lalrinsanga tun dinhmuna buhbal hnuhnang taka thar hlawk mai theih lohna chhan chu a bikin tlang ram hmalaknaah, hman atanga hmun hma ngai leh ngaia hun rei tak neih nawn fo avang hian lei lung luan ral tir mai ni loin lei tha (nutrients) nasa taka a luan ral tel avangin harsatna lian tak a thlen tih a sawi.
Mizoram leilung hi a awih avang leh, ruahtui a tam bawk avangin lei chung lang luang rak hian tharchhuah tipung turin harsatna a siam a. Hei mai bakah, kum tina ramngaw thiata lo neih hian environment danglamna a thlen avangin bul tanna thar hma laknan FOCUS hnuaiah Integrated Farming System (IFS) chu khaw 10 – Khawrihnim, Chhungte, Samthang, Hualtu, Sialsir, Chawngtlai, Chhawrtui, Lungchhuan, Suangkuang leh Thingdawl-ah te kal pui niin, he’ng khuaah te hian permanent farming system kalpui nan terrace zau tak FOCUS fund hmanga laih a nih thu a sawi.
Agriculture minister hian a bikin Kolasib leh Mamit district chhungah leilet a tam hle a. Heng leilet awmna hmunte hi Mizoram Rice Bowl tia koh theiha mawi ni mah se, leilet zau takte hi a ram neituten enkawl hlei thei lovin hnam dang enkawlna hnuaiah leh thunun hleih theih lohna hnuaia hmalak ngai dinhmuna a din avangin, hei hian thar chhuah tihpunna kawngah pawh harsatna thui tak a thlen niin a sawi.
C Lalrinsanga sawi danin, fur tawn tirh teah lei let enkawltu hnam dang te hian anmahni pual bik ei tur tai buh chingin, chumi hnuah buhpui chin chhunzawm lehin, he buhpui erawh hi ram neitute nen inzahsema hmalak thin a ni. Leilet enkawltute hian an thar chhuah hum ru in thar chhuak anga an insawi ang ang ram neitute nen hian zah leh zahin an insem thin a ni.
Agriculture hmalaknaah pawimawh tak pakhat chu alu chi tissue culture hmanga hmalak mek a nih thu a sawi a. “Aeroponic hmanga alu chi (tissue culture) hi tihpun tum niin, hetiang hmalakna hi India ramah hmun 40-ah awm tawhin, Mizoram hi a 41-na tur kan ni,” agriculture minister-in a ti.
Oil palm production & marketing-ah Kolasib, Mamit, Lunglei leh Lawngtlai district-ah te hmalak a nih thu sawiin C Lalrinsanga chuan, “Hei hian tlangram lo neih pawh kum 2022-23 chhungah ringawt pawh khan 4.19%-in a tlakhniamtir a ni,” tiin, tunah hian a hralhna rate hi Rs 10.47 per kg ni tawhin, Godrej Agrovet Ltd., leh Patanjali Foods Ltd., ah te hralh an nih thu a sawi bawk.