Zote Toyota Mizoram Premier League Season 10 round hnihna Ningani khan khelh a ni a. Champion lai Chawnpui FC in match hnih atang hnehna vawi hnih changin FC Venghnuai 3-1 in an hneh.
MPL9 final rematch a inkhel team pahnihte an inhrechiang a, Venghnuai final luhpuitu coach in tunah Chawnpui FC a enkawl tawh.
Rajiv Gandhi Stadium-ah team pahnihte an inhrechiang a, football fing khelh an tum ve ve. First half-ah goal a lut dawn lova a lan hnuah Chawnpui FC in halftime hma in K. Lalrosanga hmangin goal an khung.
Venghnuai hian Chawnpui laka tlawm nawn an tum tawh lo. Second half chhawr tangkai in minute 52-naah goal an khung a, T. Vanlalruata’n an si phurh a sut.
Nimahsela Chawnpui tan Vanlalthanga leh K. Lalrosanga ten minute 76-na leh 78-naah goal an khung a. Venghnuai tan sut theih a ni tawh lo.
Inkhel hmasa zawkah point hmuh mamawh Chhinga Veng FC leh I-Day final a an khingpui Aizawl FC te an inhmachhawn a, 2-2 in an inhnehtawk.
Chhinga Veng in Isac Zomuanpuia hmangin minute 11-naah goal an khung a, hei hi Aizawl FC tan K. Lalrinfela chuan a sut zui nghal thuai.
Second half-ah pawh team pahnih inkhel a hmuhnawm. Minute 72-naah Vanlalhriatpuia own goal hmangin Chhinga Veng bawkin hma an hruai a, mahse huntawp dawnah Lalbiakdika chuan Aizawl FC si phurh a sut.