Premier League champion Manchester City chuan Wolverhampton Wanderers atangin midfielder Matheus Nunes chu Pound maktaduai 53 in an lalut.

An inremnaah hian Manchester City hian kum 25 mi hi an hralh leh a nih chuan Wolves hian a man an tel atangin 10% an chang ang.

Ram tana vawi 11 inkhel tawh Portugal international hian City hnenah hian kum nga contract a ziak.

“Manchester City ka zawm hi ka hlim a, Europe a champion an ni a, hun engemaw chen atanga ka club ngaihsan an ni tawh.”

“Pep Guardiola, khawvela manager tha ber zinga mi hnuaiah leh khawvela player tha berte kianga han inkhelh theihna huntha ka bawhpelh phal lo a ni.” tiin Nunes chuan a sawi.

“Wolves ah season khat ka hman chhungin thil tam tak ka zir a, Premier League-ah hma sawn zel tura ka inzir chhunzawm thei tur hi ka lawm bawk. He league-ah keimah a theihna sang ber a phawk chhuak a, City-ah hian hlawhtling tura bul tan ka chak tawh hle.” a ti bawk.

“A tul kher lo”

Manchester City hian Nunes lei dilna an siam hmasak zawk hi hnawl a ni tawh a. Wolves hian a man atan Pound maktaduai 60 an beisei.

Club pahnihte an indawr a, inremna an nei thei mai lo.

Nunes hian Etihad Stadium pan ngei a duh avangin Molineux club-ah hian training a zawm duh lova, hrem ngai hial khawpin a team a nawr.

Wolves sporting director Matt Hobbs chuan, “Kan huntawp lam kha a pawi ka ti a, Matheus-a thiltihdan kha a tul kher lo a ni, mahse a tawpah erawh kan zavaiin kan inrem thei tlang a, a tha ber.”

“Matheus hi talent nei tha tak a ni a, season hmasa kha team tan season harsa a ni a, amah pawhin a beisei angin a inlan lo tih a inpawm ang. Kan team in season harsa kan hman avangin a tan pawh a harsa ve a ni.” a ti a. Nikum nipui khan club chanchin a player manto ber ni turin Sporting Lisbon atangin Pound maktaduai 38 in an lalut.