New Orleans thuneitute chuan an khawpui pumah curfew an puang a. Hetih lai hian Louisiana leh Mississippi state-ah chuan mi tam zawkin Hurricane Ida avangin power an la nei lo bawk.
Mayor LaToya Cantrell chuan curfew hi zan dar 8:00 atanga a tuk zing dar 6:00 thleng zel niin police-ten hmun hrang hrangah hurricane thawk denchhena inrawkna a thleng niin an sawi.
Energy company-te chuan Ida-in a tihchhiat power peknate chu siam that tumin an bei mek a; mahse, hmun thenkhat chuan chawlhkar khat chuang a ral hma chuan êng an nei dawn lo.
Tui lakna leh thil dang pawh a chhe nasa hle bawk.
Thawhtanni khan Lucedale, Mississippi bula kawngpui lian intawhna pakhat a chim avangin mi pahnih an thi a, mi dang 10 velin hliam an tuar bawk.
Feet 50/60 vela zau leh feet 20/30 vela thuk kuaah car eng emaw zat a tla niin highway police chuan an sawi.
Thuneitute chuan chhum zing leh ruah vangin lirthei khalhtu tam takin thui an hmu thei lo niin an sawi a, hei vang hian chhiatna dang thleng zel tur ven nan kawngpui pawh an khar rih.
Category 4-a na Ida-in United State khawmual a kai lai khan helai hmunah hian ruah inches riat vel a sur a ni.
Ida hi chak tawh lo hret hret mah se thuneitute chuan US chhim lamah ruah leh tui fawn nasa tak a la thlen thei reng niin an sawi.
Thawhlehni khan Tennessee-ah a awm a, hmun thenkhatah chuan ruah tam tak a sur a, tui lian thei laka inring turin mipuite hriattir an ni.
Tual chhung thuneitute chuan hmun hima insuan chhuakte chu an inah kir mai rih lo turin an ngen a. Chenna in leh sumdawnna hmun maktaduai chuangin power an la nei lo va, a tam ber hi New Orleans-a mite an ni.
Mayor Cantrell chuan Nilainiah hian transmission thenkhat chu a nun theih tawh a beisei thu a sawi a; mahse, khawpui pum a êng thei dawn tihna a nih loh thu a sawi.
Sorkar laipuia thuneitute chuan ram bial (parish) 17-a mi 4,41,000 vel chuan tui in tur an nei lo tih an sawi a. Hetiang zat vel bawk hi thla khat vel power nei lo thei dinhmunah an ding niin an sawi bawk.
Hetih mek lai hian khua a lum dawn tih sawi a awm bawk a, hmun thenkhat chu 35°C laia lum pawh a ni dawn niin khawchin lama thuneitute chuan an sawi.
Louisiana Governor John Bel Edwards chuan line worker 25,000 rualin power siam that tumin an bei tih a sawi a, “Tun dinhmunah erawh an thlen chin hriat thiam la har rih hle,” a ti.
Hetih lai hian Louisiana Lieutenant Governor Bill Nungesser chuan Ida avanga thi hi an pun a rin thu a sawi ve mek bawk.