Indian National Developmental Inclusive Alliance (INDIA) chuan kum 2024 ram inthlanpuiah ‘a theih chen chenah a huhova inthlan chuh theih’ an tum a. Bial an inchan sem dan tur pawh a rang theih ang bera tihfela ‘a huho thinlung pua chet chhuah’ ni se an ti.
Eptu party hrang hrang tangrualte hi a vawi thum nan Zirtawpni khan Mumbai-ah an inhmu khawm leh a, a hma thei anga ram chhung hmun hrang hrangah mipui nghawng thil leh thil pawimawh dang sawia vantlang inkhawm koh an tum.
Inthlanpui an hmachhawn turah inbiakpawhna lam leh chanchinbu lamah an kal dan tur hrang hrang puan zau hle pawh an tum a, an thupui (theme) atan ‘Judega Bharat, Jiteega India [India will unite, win]’ tih chu tawng hrang hranga nasa taka puan an tum a ni.
Eptu party 28 hruaitute hi inthlan hmachhawn tura inbuatsaihna atana thukhawm an ni a, a hma lawk hian sorkar chuan September thlaah parliament special session an ko nghe nghe.
INDIA-a tel zinga state chief minister pahnih, Mamata Banerjee leh Nitish Kumar te chuan tangrual hruaitute chuan ‘thutlukna an siam thuai thuai’ a ngai niin an ngai a. Delhi Chief Minister Arvind Kejriwal pawhin bial inchan sem chu state level atanga bultana sawiho hmasak chi nia a ngaih thu a sawi bawk.
India inthlanpui hi April-May, 2024-a neih tura ngaih a ni a, INDIA-a tel hruaitu thenkhat chuan a aia hmaah pawh sorkarin a ti thut thei niin an ngai bawk.
Banerjee-i hian tangrualte hian agenda tha tawk tak, thil pawimawh bik panga paruk vek neih hmasaka campaign bul tan nghal a duh a. Rajghat, Delhi-ah October 2 atang hian tan mai a duh nia sawi a ni.
INDIA hi June thla khan a vawi khat nan Patna-ah thukhawmin July-ah Bengaluru-ah an thukhawm leh a. Party hrang hrang zingah ngaihdan inang tlang deuh neite chuan hmun khata inthlan chuh an tum a. Tun tuma thutkhawmah pawh hian chu lam hawi deuh chu an sawi tawh a ni.