Aizawl : Revenue Minister Lalruatkima chuan Vaivakawn Zohnuaia leiminna hmun chu nimin zing khan a tlawh a, leimin avanga harsatna sutkian theih dan tur a enfiah.
Vaivakawn Zohnuai kaltlanga Mizoram University kawng chu lirthei te kal tlang theiha laih zau hlek a siam rem dan zawng turin PWD chu a tul anga hma la nghal tura tih a ni a. A kaihhnawih dang department PHED, Disaster Management & Rehabilitation leh AMC pawh biak pawh nghal niin an mawhphurhna theuh te ngaihtuah nghal tura tih an ni.
Aizawl West II bialtu MLA ni bawk Lalruatkima chuan, “Mizoram University leh FCI Kudam awmna a nih bakah Aizawl West lam mipui tan he kawng tlang lo hian harsatna a siam nasa hle a. Chhiatna thlen belh lo zawng a, motor kal tlang tir leh dan zawn hi a tul hle a ni,” a ti a. Chutih laiin, lei hi a la tawlh a, a la che mek zel nia a lan avangin ruahmanna lian tham siam nghal erawh a harsat thu a sawi.
Minister hi Lalfakzuala Chenkual, Councillor AMC, PWD E-in-C Er. B. Lalawmpuia leh khawtlang hruaitute’n an tawiawm a ni.