Aizawl: DM&R Minister Lalchamliana’n leimin avanga harsatna thleng thin tam zawk chu pumpelh theih a nih thu leh tui tla tam ta lutuk chungchangah mipui zirtirna lian tham program huaihawt tum a nih thu a sawi.
He thu hi nimina Sairanga Railway lei dawh chima chhanchhuah hna leh ruang senghawi hnathawh dan thlir letna hun an hmannaah a sawi a, Chama chuan leimin avanga harsatna thleng tam zawk chu pumpelh theih a nih thu te, Mizoram leilung chu a nghet lo a, lirnghing tamna Seismic Zone 5-a awm a ni bawk tih sawiin, in sak leh lei laih chungchangah pawh thuneitute khap ngai loa fimkhur tlan a ngaih thu a sawi.
Tui tla an tam ta lutuk chu a zia lo tih thu sawi bawkin, hemi chungchangah pawh mipui inzirtirna atan lian tham deuhin program huaihawt tum a nih thu a sawi a ni.
DM&R Minister Chama chuan railway lei dawh chim avanga chhiatna rapthlak tak a thleng chu pawi a tih thu sawiin, vanduaina lo thleng chungchanga chhanchhuah hna thawktute, a hnua ruang senghawi hna thawktu hrang hrangte chu fakawm a tih thu a sawi a. DM&R-in a mamawh hmanruate a theih anga tihchangtlun zel a nih dawn thu sawi bawkin, tunah hian hetiang chhiatrupna lo thlenthulha tangkai em em, drone lian chi pawh lei tum a nih thu a sawi bawk a ni.
An inhmuhkhawmnaah hian lei dawh chima chhanchhuah hna thawktute – Aizawl DDMA & QRT, Superintendent of Police, Aizawl District, Superintendent of Police(Traffic Police), Forensic Science Laboratory, CMO West & Civil Hospital, Aizawl, SDRF from 1st & 3rd MAP, 5th IR, 1st Bn NDRF, 38th Bn BSF, Mizoram Police Dog(Canine) Squad, CYMA, YMA leh VC, Sairang, Sairang Dinthar leh Sihhmui te hnenah chawimawina hlan an ni.