Aizawl: ICFAI University, Mizoram chuan nimin khan zirlai lut tharte lawmna hun an hmang a, he huna khuallian, Chief minister Zoramthanga chu Mizoram chhehvela cheng Zofaten harsatna an tawhna kawng hrang hranga a hnathawh that avangin chawimawina thuziak an hlan.
Khuallian chuan ICFAI University chu ramin a chhawrin a tangkai hle tih a sawi a, campus tha leh zau tak an nei chu an vannei a tih thu leh ram tana mi chhawrtlak chher chhuah kawngah tan la zel turin a chah.
CM chuan zirlaite chu mahni state chhungah ngei, boruak ralmuang leh zalen taka zir theia an awm chu an vannei hle tih hrilhin, tha taka zirchhuaka hlawhtling tura beia chhungkua, ram leh hnam tana mi tangkai tak nih tum tlat turin a fuih a. Ruihhlo leh a kaihhnawih nunkawng tha lo te laka fihlima Pathianin anmahnia a dah theihna ropui tak awmte a taka hmang chhuak turin a chah a ni.
Freshers’ Social inkhawmah hian zirlai naupang tharte lawmna leh inhmelhriattirna thil chi hrang hrang buatsaih a ni a, ICFAI University Registrar Dr. David Lawmzuala’n an university chanchin sawiin, New Education Policy zuiin kumin atangin an course structure an thlak vek a, programme course 12 an kalpui mek thu te, kumin atangin an university-ah hian Ph.D a zir theih tawh tihte a sawi.
ICFAI University Mizoram hi Section 4(2) of the Institute of Chartered Financial Anslysts of India University, Mizoram Act, 2006; Mizoram Legislative Assembly-in a pass behchhana din a ni a, Chaltlangah mi mal in luahin bul an tan a, 2011 kum atangin tuna an awmna, Durtlang North-a an Campus-ah hian an insawn leh a ni.
Tunah hian zirlai 630 an awm mek a, thawktu hi Assistant Professor 28 leh Guest Lecturer 30 neiin an zinga zaa sawmsarih hian doctorate degree an nei a. Non Teaching Staff-te nen thawktu zawng zawng hi mi 92 vel an awm mek a ni.