• Ruata

Vawi duai lo kan lo thailan tawh leh thawm lo nei tawh New Generation Royal Enfield Bullet 350 chu tlangzarh a ni ta a, he bike thar hian J-series ho a rawn zawm veleh a, an bike chhuak mek J platform-a upgrade zinga a hnuhnung ber a ni ta a ni.

Bullet 350 model hi Royal Enfield bike zingah ro ro chuan a chhuak rei tawh ber leh la chhuah chhunzawm zel model hlun tak mai a ni a. Mi tam takin Royal Enfield bike sawi nana kan hman hming lar tak a ni bawk a, hei hian a hlun zia leh India ramah chuan a tlaktlum zia a tilang chiang awm e. Tuna a thar tur hi Classic 350 nen pawh a inhnaih viau a, a design erawh hmanlai atanga kan hmuh ang Bullet 350 zia paih lo thei ang berin an lo la duang a, hei hi hman atanga tun thlenga a ‘special’ na riau a ni a tih theih awm e. A kentel hmanraw changkang bakah a bike part hrang hrangte hi a tunlai tawh viau a, hetihrual hian Bullet na a paih lo a ni.

2023 Royal Enfield Bullet 350 hi variant hrang hrang – Military (Red leh Black), Standard (Black leh Maroon) bakah a man to ber Black Gold te duhthlan tur a awm a. A man lamah chuan Military ho hi tlawm berin Rs 1,73,562 man atangin a intan a, a laihawl Standard model hi Rs 1,97, 436 man ni bawkin a man to ber Black Gold hi Rs 2,15,801 man a ni thung a, a man tarlan te hi ex-showroom price vek a ni.

A khawl lam

Bullet 350 a nih angin a khawl len zawng hi a chu a ngai ang a la ni a, hetihrual hian Classic, Hunter leh Meteor tea kan hmuh ang 350cc J-series khawl thar kan hmu a. A khawl hi 349cc, air-cooled J-series engine niin hei hi a nghawr a tlem bakah a boruak chhe pekchhuah pawh a tlemin khawl fai leh tunlai tak a ni a. Khalh pawh nuam viau tura duan niin a khawl hi a damin a chak tha em em a ni. He khawl hian 20.2bhp power chu 6,100rpm-ah pechhuakin 27Nm torque chu 4,000rpm-ah a pechhuak thei bawk a. 5-speed gearbox thar tha lehzuala thawm a ni bawk.

Suspension leh himna lam

A suspension set up pawh hi tha tak leh khalh nuam taka duan a ni a, a hmalamah telescopic fork hmangin a hnungah twin gas-charged shock absorber kan hmu a. Himna lamah pawh ABS technology chu a man tlawm lamah single-channel leh a chunglamah dual-channel kan hmu a. A hmaa ke sin tak a hman thin kha rawn thlakin tunah chuan a hmalamah 100-section leh a hnunglamah 120-section tyre te kan hmu a ni.

Kentel hrang hrang

A kentel lamah chuan a man tlawm ber Military variant-ah hian solid-color tank, black accent, decal graphic mawi tak, chrome engine leh kan tarlan tak single-channel ABS te kan hmu a. Standard variant thung chuan a hmaa kan hmuh thin ang, ti Standard tu tak mai, a tank a badge kan hmuh thin chu kan hmu leh a. Chrome and gold 3D badging a ni a, hei bakah hian chrome-finished engine leh mirror, signature gold pinstriping, body-colored element leh tank, rear disc brake, leh dual-channel ABS te kan hmu a ni. A man to ber Black Gold-ah hian matte black & gloss color scheme mawi tak kan hmu a. Coppa & Gold 3D badging, Coppa pinstriping, blacked-out engine & components, rear disc brake leh dual-channel ABS te kan hmu bawk a ni.

Bullet 350 thar hian seat nuam tak neiin chuan nuam tura duan a ni a. Hei bakah hian semi digital instrument cluster a nei a. Tripper navigation leh alloy wheel chu a duh tan chuan a hranin a vuah theih bawk a, a bike in a kengtel lo thung a ni.