Afghanistan khawchhak lama Jalalabad khawpuiah Nilaini khan judge lambun niin kah hlum a ni a, thla khat pawh liam lo chhunga he rama court-a thuneitu sang thah pathumna a ni ta.
Judge Hafizullah hi a hna kal tur motor trishaw-a a chuang chu lambuna thah a nih thu Nangarhar province police thupuangtu, Farid Khan chuana sawi.
Jalalabad public hospital-a doctor, Gulzada Sangar chuan Hafizullah-a taksaah hian silaimu tam tak a luh thu a sawi.
Afghan mi dang tam tak ang bawka hming pakhat chauh nei, Hafizullah-a hi January 17-a Kabul khawpuia Supreme Court-a thawk hmeichhe judge pahnih thah an nih hnua thah veleh a ni.
Nilaini vek chawhma lam khan Kabul-ah a chuanna lirtheia bomb kam puak vangin a thi bawk a, mi pathumin hliam an tuar bawk.
Thawhlehni pawh khan hetiang chiah hian Afghan khawpuiah hian bomb pathum a puak a, a puak pakhatah Muslim sakhaw zirtirnaa hriat hlawh tak a thi.
Mohammad Atif-a thah hi a hnuah ISIL (ISIS) chuan an tihah an chhal zui a. He pawl hi tun hnaia an khawpuia mi thahnaa inhnamhnawiha inchhal tam ber an ni.
A hma zan chiah khan chhim lama Uruzgan province-a sipai hmunah car bomb tihpuah niin venhim hnathawktu pali an thi bawk niin Governor Mohammad Omar Shirzad chuan thuthar lakhawmtute hnenah a sawi.