Aizawl: Chawngtea Mizo leh Chakma tlawmngai pawl hrang hrang intelkhawm chuan Chawngte khaw chhung kawngpui chhiat vanga lungawi lohna lantirna atan nimin khan kawng an zawh.
The Lawngtlai Post-in a tar lan danin kawng zawhah hian mi 500 chuang telin Chawngte Football Ground atangin SDO (Civil) office thleng kawng an zawh a, pawl hrang hrang aiawhten thu an sawi.
Thusawitute chuan kawng hrang hrangah Chawngte ngaihthah an nih thu te, kawng chungchangah an chan tur leh a nih dan tur ang kan ni phak lo fo thin thu te, Mizoram sorkarin an dinhmun harsatziate hriaa ngaihsak ve se an duh thu leh CADC sorkar pawhin theihtawp chhuah ve se an duh thute an sawi hlawm.
All NGO kal khawm chuan Mizoram sorkarah Chawngte SDO (C) kaltlangin memorandum an theh lut nghal. SDO hi election thila training a neih lai a nih avangin SDO charge latu Samar Bijoy Chakma chuan memorandum hi a dawng. Samar-a hian tlawmngai pawl hruaitute hnenah memorandum chu Lawngtlai DC office-ah thawn nghal a nih tur thu a hrilh.
All NGO hruaitute chuan sorkara an thu thlen chungchang tun chawlhkar Zirtawpni thleng ngaihchan an tum a, hmalakna an hmu lo a nih chuan a tawp thlengin hma lakzui zel an tum.