Mizoram Pradesh Congress Committee (MPCC) chuan Prime Minister Narendra Modi kaihhruai sorkar hnuaiah India ‘Union of States’ a nihna a derthawng mek zel niin an sawi.
Nimina thuchhuah an siamah Congress party chuan September 9, 2023-a G20 Dinner neih turah president-in sawmna a siamah ‘President of India’ ti lovin, ‘President of Bharat’ tia a ziak chu India danpui Article 1-a ‘Bharat, India chu Union of States’ a ni ang a tiha ‘Union of States’ chu derthawngah a siam niin an tar lang.
MPCC huan India tih aia official-a ‘Bharat’ hman luih a ni hian India rama Hindu lentir tumna kal zel nia tar langin, “‘President of Bharat’ tia sawmna semchhuah a nih hma lawk hian Hindu kulhmuk, Rashtriya Swayamsevak Sangh (RSS) chuan India tih hmang tawh lovin Bharat tih hman tawh tur an ti bawk,” an ti.
Congress party chuan BJP hian India tih hi an hnawl ngawt theih a nih loh thu leh India chu political party pakhat ta a nih loh thu sawiin, “National Identity hi BJP personal property a ni hek lo. Centre-a BJP kaihhruai NDA te hi a bik takin Northeast state-te tana hlauhawm zual an ni,” tiin, thuneihna an chan theih nan mipui thlan sorkar pawh zah zo lovin, a remchan dan ang anga paihthlak tum reng an nih thu an sawi bawk.
BJP hian mipui thlan sorkar chu namnula paihthlak an ching a. Hei vang hian kum 2014 hnuah bye-election tum 436 lai parliamentary leh assembly constitutency-ah te awm phah tawh niin an sawi a. BJP sorkar Modi kaihhruai hian history herkawi danglama India thendarh an tumna leh Hindu rama siam an tumna chu chak takin an kalpui mek reng avangin Kristiante tan a him lo takzet a. Manipur buaina pawh BJP rorelna hnuaia thleng a ni a, Zohnahthlakte chu a tuartu ber an nih avangin BJP sorkar hnuaiah hian India a him mawlh lo va, a him lo zui zel dawn bawk tih an tar lang.
BJP hian ‘One Nation, One Election’ mi barhluih an tum mek a, chu mai bakah ‘One Nation, One Law’ (Uniform Civil Code) phur takin an buaipui mek bawk tih tar langin Congress party chuan, “Tun ang renga thil a kal chuan ‘One Nation, One Religion’ pawh an la ti duh mai dawn a. New Education policy hmangin ‘three language formula’ kalpui an tum mek bawk a, ‘One Nation, One Language’ pawh an thil tum bul ber pakhat a ni bawk,” an ti.