Tottenham Hotspur player pahnih Tangur Ndombele leh Davinson Sanchez te chuan club chhuahsanin Turkish club Galatasaray an zawm.
Kum 26 mi France midfielder Ndombele chuan Turkey champion ni lai hi season tluan atan loan in a zawm a, Pound maktaduai 12.8 in a nghetin an lei thei ang.
Hetihlai hian kum 27 mi Colombia defender Sanchez hian Galatasaray hnenah hian kum li contract a ziak a, kum khat ziah belh theihna awm bawkin Spurs nen a man atan hian Pound maktaduai 8.1 in an inrem.
Sanchez hian kum 2017 khan Spurs hi Pound maktaduai 42 velin Ajax atangin a zawm a, a hunlaia an player lakluh manto ber a ni.
Ndombele hi kum 2019 khan Pound maktaduai 55 in an lalut a, ani pawh hi a hunlaia an player lak manto ber a ni ve bawk.
Club tan player tangkai nimahsela tunhnaiah khelhna hmun an chang tam lova, tun season bikah Ange Postecoglou hnuaiah Premier League inkhelah bul an la tan lo.
Ndombele hian loan in Lyon leh Napoli tan te a lo khel tawh bawk a,season liamta khan Napoli tan hian match 40 a khel.