Real Madrid leh Paris Saint-Germain defender hlui Sergio Ramos chuan a chawrchhuahna club Sevilla a zawm.
Kum 37 mi hian Paris khawpui a contract a neihlai a hman zawh hnuah free agent niin tun nipuiah club dawrtu a nei nual a. Sum tam zawk hlawh tura sawmtu awm mahse Andalusia khawpuia kir a thlang.
Ramos ngaihventu zingah Saudi Arabia club Al Ittihad, Turkish club Galatasaray, Portuguese club FC Porto leh Major League Soccer club-te an langsar a, nimahsela mahni khua a kir leh a duh zawk.
“Sergio hian kum sarih mi a nihin kan club a zawm a, youth academy ah inzirin kan youth team atang a kal chho zel a, kum 2002-03 season khan kum 16 mi niin first reserve team tan a inkhel tan.”
“Kan academy chhuak centre-back hian kum 19 mi nia Real Madrid a pan hnuah kum sawm hnih dawn chuang a liam tihin a inpuiah a rawn kir leh a ni.” tiin an defender hi an lo lawm.
Ramos hian Madrid-ah hian season 16 a hman hnuah kum 2021 khan Paris Saint-Germain hi free transfer in a zawm a. France-ah season hnih a hman chhungin Ligue 1 title vawi hnih a la hman.
Ramos hian kum 2004 February 1 khan kum 17 mi niin Sevilla first team tan a inkhel tan a. A kum lehah an tlarhnung a player tangkai niin kum 2005 khan Real Madrid in a hunlaia Spanish defender manto ber ni turin Euro maktaduai 27 in an lalut.
Los Blancos tan season 16 a inkhelh chhungin vawi 671 a inkhel a, goal 101 khungin UEFA Champions League title vawi li a lak hman bakah La Liga trophy panga a la hman bawk.
Ram tan vawi 180 inkhelin goal 23 a khung bawk a, kum 2010 a World Cup a champion team-ah telin European Championship vawi hnih la thei team-ah mi pawimawh a ni bawk a. Kumin February thla khan ram tana inkhelh a chawlhsan thu hi a puang.