Kar kalta khan mizoram agriculture minister Pu C.Lalrinsanga chuan mizoram buh thar tam theihna kolasib leh Mamit district a buh tharte chu hnam dangin an enkawl a. Hemi avang hian state pawnah kan buh thar a chhuak nasa ani a ti bawk. Kolasib leh Mamit district chu hmun tha kan neih anih avangin rice bowl of mizoram ti hiala sawi theih ani a ti. Minister thusawi hi ngaihtuah chian zui a tul khawp mai.
Kan ram buh thar zat hi kan department lam hian engzatnge anih a, engzatnge state pawnah chhuak thin tih hi chian a tul hle. Kan hotute hian thil hi an sawi pawp pawp a. A nihna tak hi chiang si lovin an sawi mai mai a. Hnamdang enkawl leilet engzatnge awm a, eng anga zau nge an enkawl. Kum khatah buh engzatnge an tharchhuah chiah hi kan hriat a ngai. Kan rama buh thar zat chiang takin kan hria ang a. State pawna a chhuah loh dan kan dap ang. Chumi mil chuan supply department in kan ram mamawh buhfai la lut sela buhfai mana kan senral hi a tlahniam kawkin a rinawm.
Kum sawmthum chuan state kan nih hnuah pawh kan ram mamawh buh leh thlai dang hi engzatnge kan thar theih theih tih hi kan sawrkar hian ziak fel tak record a la nei lo reng reng niin a lang a. Mihring intodelh tur chuan kan mamawh zat kan hriat a ngai a. Chumi mil chuan chhungkua kan khawsa thin a ni. Mahni mamawh zat pawh hre lo a khawsa ve tawp tawp ringawt chhungkua chuan awmzia an nei lova. Chhungkaw in enkawl fel lo an ni thin ang hian kan state pawh hian kan mamawh zat leh kan tharchhuah zat kan hriat loh chuan eng ang pawhin buh leh thlai hi tharchhuak mahila awmze neiin kan kal ngai lovang a. Tharchhuak nia kan inhriat laiin a put ru lai pawh kan hre lovang a. Intodelh tik ni kan nei ngai lovang a. Harsatna chuan min kiansan mai lovang.
A pawimawh berah chuan kan state hi kan hrechiang tur a ni. Kan buh leh thlai thar zat pawh hre thei lo hian intodelh ngaihna a awm lova. Buh leh thlai thar hi a enkawltu agriculture leh horticulture department kan nei a. Anni hian kan neih zat leh kan.mamawh zat an hria ang a. Chumi mil chuan intodelh turin hma kan la ang a. Mamawh zat aia kan thar tam anih chuan a hralhchhuah dan pawh ngaihtuah tur ani ang. Tuna kan kaldanah hi chuan kan thlai a thar tam leh kan mangan pui a. A thar tlem leh kan mangang bawk ani ber a. Kan hmalakna hi a bul atanga enfel a. Data hmanga kan inchhut a ngai tawh a ni. Hei hi thil harsa ani lo. A thawktute tih tak tam leh tih tak tak loha innghat mai a ni. Kan thlai thar zat enfiah lamah kan sawrkar hian tan han la teh se. A bul tan that leh hi a la tllai love. Minister in khawtin leh leilet tin thar zat dik tak ka hre duh ani han ti sela a fiah kuar mai ang. Tih tak takna leh tumruhna a ngai a ni.