Myanmar hruaitu hlui hren mek, Aung San Suu Kyi chu a taksa chak lo zel mah se enkawl phalsak a ni lo niin a fapain a sawi.
Kim Aris chuan sipai roreltuten tan in thuneituten a nu hi ‘hmanhmawh taka enkawl ngai’ tia an dilna an hnawl niin an sawi.
BBC Burmese chuan kum 78 mi Suu Kyi-i hi a ha a na a, hei vang hian engmah a ei thei lo niin thu a dawng tih a tar lang.
Sipai thupuangtu chuan Suu Kyi-i hi a hriselna a tha a, sipai leh vantlang doctor-ten an endik reng niin a sawi ve thung bawk.
Suu Kyi-i hi February, 2021-a sipaiten sorkar leh amah an paih thlak hnuah hren zui a ni a. July khan lung in atangin Burmese khawpui, Nay Pyi Taw-ah pawn chhuak thei lo (house arrest)-in sawn a ni a; mahse, khawi laiah nge hren a nih hriat a ni chuang lo.
“Lung in tang damlo, damdawia enkawl mamawh tak phalsak a ni lo hi a rapthlakin a nunrawng hle,” tiin Aris-a hian BBC Burmese hnenah text message hmangin a hrilh.
Kum 46 mi, UK-a cheng hian a nu hi a luak a, a hriselna hniam em avangin a khaw hmuh pawh a fiah lo niin a sawi bawk.
“Tu pawh ni se, ka naa engmah ei thei lo chu enkawlna tha pek a nih si loh chuan a hriselna dinhmunin a tuar hle dawn a ni,” tiin a sawi.
Nobel Peace Prize pawh lo dawng tawh, Suu Kyi-i hi amah hre chiangtu tak pakhat chuan tun hma atang tawhin ha na hi a nei thin BBC Burmese a hrilh a, a thisen a hniam hle bawk niin a sawi a. Tun hnaiah a ha na hi a zual niin an sawi bawk.
A ei atan chaw nem lampang chi leh damdawi telh jelly an pe a, hei hi a ha na chhawkna atana tih a ni tih sawi a ni.
Myanmar-a political party hrang hrangten an din, National Unity Government chuan khawvel ram dangte chu politics thil avanga an mi man, Suu Kyi-i te angte tha zawka enkawl turin ‘sipai sorkar nawr’ turin an ngen.
Khawvel ram hruaitu Suu Kyi-i hi eng intiamkamna mah awm lova chhuah nghal turin an lo ti tawh thin a, ani bakah hian sipaiten sorkar an paih thlak duh lohna lantirtu mi sang tam tak an mante pawh chhuah turin an ti bawk.
Myanmar-ah hian sipaiten sorkar paih thlaa thuneihna an chan hnuah hian anmahni duh lotute nen tharum nen inbei zuiin tual chhung indona a awm mek a, mi sang tam tak an thi tawh.
Sipaite hian anmahni duh lotute hi na takin an chhang let thin a, thlawhna hmang pawhin an bei thin a, hei hian civil mite thihna a titam hle a. Mihring dikna chanvo humhalhtu pawlte chuan sipai hotute chu war crime nei ngeiah an puh bawk.
Khawvel ram hruaitute chuan sipai chakna hmanga sorkar paih thlak hi demin an general-te leh sipai enkawl company-te an hrek bawk.
Suu Kyi-i hi an rama mipui rorelna a awm theih nana nasa taka beitu niin ngaihsan pawh a hlawh a. Tun hma pawhin sipai hian an lo hreng fo tawh thin.
Hetih lai hian an rama mi dang nena hotu nihna an intawm an neih laia Rohingya Muslim-te laka sipaite rawng taka an chet danah erawh khawvel dem a hlawh hle thung.
Myanmar-a sipai helna hi Indonesia-a Asean Summit neih mekah pawh an sawiho lian ber a ni a. Asia chhimchhak lam ram hruaitute hian sipaite chu an rama tharum thawhna a la thlen reng avangin an dem hle.
Tun tum hi member an nih vena tho intawh khawma a zawna kum hnih tel tura sawm an nih lohna a ni ta bawk.