US Open hmeichhe singles a seeded number two hauhtu Aryna Sabalenka chuan a zawna kum thum nan US Open semi-final a lut a. Seeded number 23 Zheng Qinwen a thunun hneh hle.
Tun kartir a world number one thar a ni dawn tih a chian hnuah Sabalenka a la che tha chhunzawm viau a, 6-1 6-4 in a khingpui hi a hneh.
Kum 25 mi Belarusian player hian semi-final a luh vawi thumna ni dawn mahsela New York ah hian final a la khel ngai lo.
Final luh inchuh turin kum 2017 runner-up Madison Keys nen an inhmachhawn dawn.
Thahrui ngah leh ball vaw na thei tak Sabalenka hi tournament tan hma in champion lai Iga Swiatek nen kuminah rinkai langsar an ni a. Sabalenka bik hi kuminah WTA Tour-ah a chetthat theih em avangin rin a hlawh a, US Open-ah tum dangah a lo chetthat tawh bawk avangin el tham viau tura ngaih a ni.
Australian Open champion lai niin kuminah Grand Slam inelna semi-final a lut vel tihna a ni a, kum 2016 a Serena Williams hnua hetiang ti leh thei hmasa ber a ni.
“Vawiinah tennis tha tak ka khel a, hnehna ka chang thei hi ka hlim. Tun tournament-ah a kheltha thin hle a, chuvangin ka chak hi thil lawmawm tak a ni.” tiin Sabalenka chuan a chak hnuah a sawi.
A khingpui tur Keys hian Wimbledon champion Marketa Vondrousova 6-1 6-4 in a hneh ve thung a. Keys hi tunhnai thla engemaw zat chhung che tha tluang pangngai tak niin Wimbledon-ah pawh quarter-final a invawkai tawh.