Aizawl: Chief Minister Zoramthanga chuan Mizo Students’ Union General Conference vawi 21-na, vantlang inkhawm, Thenzawl Auditorium-a neihah khuallian niin a hmanpui a. Ram leh hnam chhan nan tu lakah mah dawih aw chhuah a thiang lo tih a sawi.
Chief minister chuan Mizoramin buaina a tawh zual vanglaia thlamuang taka an awm theihna hmun, East Pakistan an luh laia an thlamuanzia kha sawifiah thiam a har hle a, lungmuanga zan khat mut kha a thlakhlelhawm hle tih sawiin, “Chutiang chiah chuan tun hnaia kan chheh vela buaina leh harsatna tawk kan unauten thlamuang taka mutmu an tuah a, an ni tin nun an hman theihna tur Mizoram an rawn pan leh an beisei ang ngeia ralmuanga an awm mek hi a hlu hle a ni,” a ti.
Khawvela ram ralmuang berte zinga mi Mizoram neitu an ni chu a hlutzia hre thar tura chahin Zoramthanga chuan, “Buaina namenlo paltlang hnua ram ralmuang lo ni ta, Mizoram huhang hi a na em em a ni. Kan neih ang remna leh muanna tluantling neih ve theih beiseiin kan thenawm state leh ramten Mizoram lam hi an rawn hawi thin a, Aizawl hi an rawn be pawp thin,” tiin, Mizoram huhang zar pawh an zo tlang chho zel a, an la zo chho zel dawn niin a sawi.
Ram leh hnam chhan nan hian tu lakah mah ‘dawih aw’ chhuah a thiang lo tih sawiin chief minister chuan, “Ram buai laia huaisen taka mipuite tana zirlai pawlin hma a lak thinzia te kha theihngilh theihna ni tawh lo,” tia sawiin, ram tana huaisen taka lo bei tawhtute hnung zui zel tur leh, ram he hnam Pathianin a pek chu hmangaih taka enkawl turin zirlaite a chah bawk.
Khualzahawm Robert Romawia Royte, Minister pawhin Mizoram leh India sorkar inremna (peace accord) thuthlung kha a hlu hle tih sawiin, “Hmasawnna duhawm tak tak kan hmuh chhoh zel bakah Article 371G hnuaiah kan hnam, kan ram hi ven tlat kan ni. Hei hian kan hruaitu hmasa te lo finzia leh ram an hmangaihna thukzia a tifiah hle,” a ti bawk.
Vantlang inkhawm hi MSU General Secretary Lalramhluna Fanaiin a kaihruai a, MSU President Samuel Zoramthanpuia leh Central YMA President R. Lalngheta ten thu an sawi a. Khuallian chief minister chuan MSU magazine ‘Kulva’ a tlangzarh nghal a. Ladies Organisation-ten Myanmar atanga raltlante hmangaih leh duat taka Mizoramin a lo tuamhlawm avanga an lawmzia tar lanna chu chief minister hnenah leh Central YMA hnenah ‘Lehkhapui’ (Citation) an hlan.
MSU inkhawmpui hi Nilaini zan atang khan neih tan niin vawiin hian a tiak ang.