American tleirawl Coco Gauff chuan tournament tha a hman mek chu final khelin champion theihna remchang neiin a khar dawn a, US Open singles final a vawikhat atan a khel dawn.
Kum 19 mi Gauff hian Ningani zan khan a khingpui Karolina Muchova chu 6-4 7-5 in a hneh a. Seeded number two nihna changtu Aryna Sabalenka nen champion an inchuh dawn.
Arthur Ashe Stadium a final inkhel hi tuialhthei laihchhuak duh lohna lantirtu mi pali in minute 49 chhung an tihkhaihlak hnuah khelh chhunzawm a ni a. Tournament buatsaihtu United States Tennis Association chuan inkhel tikhaihlaktute hi New York Police Department kutah an hlan nghal.
- Gauff-i hun a inhawng e
Kum 15 leh thla thum mi ni a Wimbledon main draw khel thei naupang ber a nih hnuah Cori ‘Coco’ Gauff hian theihna sang a nei a, hma hun eng takin a hmuak niin tennis khawvel in a ngai.
Zawi zawia hmalam a pan zel hnuah tun tum hi Grand Slam singles final a vawi hnih khelhna tur a ni a. Nikum French Open-ah Polish mi Iga Swiatek nen inhmachhawnin a tlawm zawkah a tang.
Seeded number six nihna changtu Gauff hian inkhel hmuhnawm leh player pahnih inkara inthlauhna tam lo takah hian set hnihna 5-4 a hma a hruai laiin match point a nei a. Nimahsela Muchova chuan a humhim thei hram.
A tawpah erawh set hnuhnung ber la turin vawi 40 lai ball an in vuak chhawk hnuah a chakna point a vaw chhuak a, hnehna a chang.
Gauff hian a chak hnuah tun tum tournament a a chetthat chhan chu a bikin tunhnai North America a hard court tournament a khelh atang ten chiai lohna leh rilru tihpaukhauhte a zirchhuah vang nia a ngaih thu a sawi.
“Inkhel entu an tam a, min tantu an thawm a tha thin. A chang hi chuan a ring lutuk a beng hian a tlin lo mai ang tihte ka hlau. Mahse tun aia ring hian la au zel ru, ka beisei phak bak a ni.” a ti a.
“He tournament thlir reng chung hian ka seilian a, chuvangin he hnehna leh final luh hi a hlu bik a ni. Mahse ka tan a la tawp lova, ka hna ka la zo lo.” tiin a sawi.
Kum 19 mi hi kum 1999 a Serena Williams hnua American hmeichhia Grand Slam final lut leh thei naupang ber a ni a. Inkhel tihkhaihlak chuan amah a nghawng thei lo niin a sawi.
“Ruahsur vanga inkhel kan chawl angah tho khan ka ngai lui. Harsa ber chu court kan chhuahsan a ngai a, minute nga nge darkar khat kan chawlh lailawk tur hriat theih loh kha a ni.” a ti bawk.
- Sabalenka ‘comeback’ a pui
Tun tournament-ah Gauff-i bakah player dangten ngaihven an hlawh karah kum 25 mi Belarus nula Aryna Sabalenka a che tha a, a laka ‘pressure’ sang lo takin a kal tluang chho.
Tun tournament zawha world number one ni tur hian semi-final thleng set a hloh lova, nimahsela Madison Keys lakah a chesual teuh.
Set khatnaah game khat pawh a lak loh hnuah set hnihnaah tie-breaker ah a dam hram a. A tawpah 0-6 7-6 (7-1) 7-6 (10-5) in a chak ta zawk.
Australian Open champion hian hnehna chang turin a rilru paukhauhna a chhawr hle.