- Huna Kawlvawm
G20 Summit New Delhi a nghah mek chuan zanin hian a tiak dawn ta reng mai. G20 neih chhung hian Delhi Declaration phek 37 zet a thui chu pawm a ni. Russia ramin Ukraine ram a run demna lam hawi erawh khawthlang ram thenkhatte duh ang tawngkam hriam a tling zo chiah lo thung. Nakin hnu thlenga khawvelin a la sawi zui tur inremna thuthlung pawimawh tak ziah a ni a, chu chu India-Middle East-Europe Economic Corridor a ni. Hei hi China ramin BRI (belt and road initiative) el tura ngaih a ni. India-Middle East-Europe Economic Corridor hi Asia ram tam tak pawhin ngaihvena an la tel duh ngeina tur a ni. He inremna hian kawng hrang hrangin hma lakna tur a duang ang, chung zingah chuan thil siam hlawm liana chhuahna lam (manufacturing) te, mihring mamawh chaw tha, ei leh in tur hrisel (food security) te, mihring mamawh thil chi hrang hrang siamna tur hmanrua leh siam zawh sa awlsam zawka heng ramte indawr kual tawn (supply chains) te a huam a ni.
G20 Summit New Delhi a hman anih mek lai hian PM Modi leh khawvel hruaitu dangte chuan che thuthlung “India-Middle East-Europe Connectivity Corridor” hi an ziak fel ta a ni.
Prime Minister Narendra Modi chuan, “Khawmualpui hranga cheng mihringten thahnemngai taka beihna vanga inremna leh thawh hona thuthlung a ni,” a ti a. US President Joe Biden tehna thung erawh chu, “thawh hona pawimawh leh hraw tak a ni.” India, the United States, Saudi Arabia, the United Arab Emirates, France, Germany, Italy, leh European Union ram hruaitute chuan he thawh hona thuthlung ( Memorandum of Understanding (MoU) hi an tlangzarh ta a. China ramin Belt and Road Initiative (BRI) hmanga khawvel ram hmun hrang hrang Asia, Europe leh Africa ramahte hmasawnnna ruhrel Lian leh sumdawnna (infrastructure and trade networks) hmanga huang a zauhna chu a bitum leh el nghal tur a ni ngei ang.
China ramin BRI a kalpuina hian kum 10 hmel a hmuh kum a ni tawh a, mi tam takin China ramin BRI hmang hian ram tam tak leh ram thang laite a lam tangah a siam a. Hetianga ram danga hmasawnnna ruhrel lian seaport, airport, highway etc a siamsak avang hian chung a siamsak ramte chu leiba thangah a um awk thung a ni tih hi thil chik mite hmuh dan a ni. China President Xi Jinping hian thawh hona India-Middle East-Europe Economic Corridor thuthlung neih a duh thu a sawi thin a, Israel leh Jordan ramte pawh tel thei turah a ngai.
Hetiang anih mek lai hian China ramin BRI a kalpui mek hi kum 2019 atang tawh khan a hnung tawlh tan a ni tih an data chuan a tar lang thung. Covid-19 hri pui len hnuah China ram chuan an ram chhunga in sak zawhsa zuartute (real estate sector) ten an in sak zawh sa hralhnaa harsatna an tawh avang leh an leiba ngah (debt burden) vanga harsatna an tawh avangin ram pum harsatna an tawng chho mek a.
Khawvel hawiher leh hawi zawng inthlak danglam chho mek hi G20 Summit-ah hian chiang taka lang hi chhinchhiah tlak tak a ni, tih thu Italian Premier Giorgia Meloni chuan a sawi a, Italy ram pawhin chumi lam chu a awn nghal thu leh BRI hnu chhawn a duh thu a sawi. G7 ram zingah Italy ram hi China President Xi Jinping project BRI hi zawm hmasa ber a ni a, kum 2019 khan an lo zawm tawh a ni.
India-Middle East Europe Economic Corridor thuthlung puan anih thu hi US President Joe Biden chuan, “Khawvel chanchinah danglamna thlentu a ni ang. Vawiina he thu tlukna leh remruatna kan siam hian kan hma lam hun lo thleng tur thui tak a nghawng dawn a, kan zavaia hun lo awm tur a nghawng dawn a ni. Chu chu sum leng vel leh peipun dante chuan tun hma zawng aiin chik leh sawisel a tawk nasa zawk ang,” a ti.
White House-in hemi chungchanga thil awm dan leh thu dik (fact sheet) a tih chhuahin a tar lan dan chuan he thawh hona thar in a thil tumte (new corridor’s objectives) zingah hian Europe Middle East leh Asia ramte rel leh lawng hmanga inkalpawhna nei tura bul tan leh hma lak a ni. Hei hian loh theih loha a thlen tur chu sumdawnna lian tham (commercial hubs) din tura hma lakte, bungraw thawn chhuah leh lak luh dan awlsam zawk te bakah electric thahrui mamawh dan anga thawn siam leh thawn chhuahte bakah, energy grids, telecommunication lines te tui hnuaia phum (under sea cables) te, clean energy technology tih hmasawn te, mipuite tan Internet tha zawk pek te, mipuite tan ngelnghehna, changkanna leh him a thlente a ni.
India-Middle East-Europe Economic Corridor hian Asia ram dangte pawhin ngaihvena an rawn zawm thuai beisei a ni. He corridor MoU hian khawchhak Arabian Gulf kal tlanga India lam hawi (east corridor) leh hmar lam (northern corridor) Arabian Gulf atanga Europe lam hawi a ni.
A pawimawh hmasa chu rel kawng hmanga inthlun zawm (railway network) a ni a, hei hi bungraw tenau leh hrawl pui pui phurh man tihkiamna tur a ni ang a, rel kawng thlen theih tawpah lawng lian hmanga phurh a ni leh ang a, chumi hnu lamah motor (road transport routes) hman a ni leh ang. He railway route hi Middle East ram chhung atan ruahman a ni phawt a, chu chuan electric & hydrogen hmang thei tura ruahman a ni.
Hetiang kawngpui ruahmanna kimchang te, thawh dan tura mawhphurhtu leh technical lam thil tul zawng zawngte chu he thuthlung ziaktu ramte hian thla hnih chhungin a thawh dan tur (action plan) nen an rel fel ang.
India sorkar thu puangtuin a sawi dan chuan he thawh hona atan hian inrawnkhawmna leh remruat hona tha, lang tlang taka thil tihte, he thawh hona thuthlung ziaktu ramte inzah tawn tak leh tha taka thawh hona chu a pawimawh hle dawn a ni.
“Sum leh pai chungchanga mawhphurhna leh he project in a kel tel hmasawnnna leh hna leh mawhphurhna leh hlawkna tel tel theih dan (economic viability) chungchangah te tul lo taka ram leiba phurrit insiamsak belhchhahna tur a ni lo, ramin ecological & environmental standard a neihte zawm tur a ni,” tih a ni bawk.
Source :
India Today