Myanmar rama Muslim Rohingya-ten Bangladesh leh hmun danga an ram sipai hlauva an raltlan hmaa an chenna thin khua tam zawk chu tihchhiat niin police barrack atan te, sorkar in pawimawh dang atan leh raltlante dah khawmna tur (refugee relocation camp) atana hman turin sak a ni tih thuthar lakhawmtuten an tlawhnaah an hmu.
A hmain thlalem atanga thla an lakah Rohingya mite chenna thinte chu khawih danglam ngei niin a lang a. Australian Strategic Policy Institute chuan kum 2017-a Rohingya-ten an khua an chhuahsan laia sipaiten an tihchhiat 40% vel chu tihchhiat vek a ni tawh tih an sawi a. Sorkar erawh chuan in sak thar a awm tih an sawi hi a pha thung.
Kum 2017 khan Rohingya mi 700,000 chuan Myanmar hi sipaite chetna an hlauh avangin an tlanchhiatsan a. UN chuan Rohingya mite umbo tumna a nih thu a sawi hial a; mahse, Myanmar sorkar chuan an sipaiten Rohingya mite an that teuh tih an sawi chu an pha.
Myanmar hi a mi cheng tam ber chu Buddhist an ni a, an sipaiten Muslim-te beia an um chhuak anga sawina chu phain tunah hian lak kir leh pawh an tum mek a. Thla hmasa khan a vawi hnih nan Rohingya raltlante hi lak kir an tum a; mahse, lak kir tum mi 3,450-te chuan kum 2017-a an chhuahsan hma ang thovin an awm thei a, khua leh tui nihna pek an ni dawn em tih engmah a chiang lo nia sawiin an duh lo.
Myanmar chuan an raltlanna, Bangladesh demin lak kir tuma an inpeih vek tawhna chu an tikhawlhkham niin an sawi a. Hemi tichiang tur hian chanchinbu mite an sawm a, an hruai kir huna an khawsaktirna tur atana an ruahmante a fanpui a ni.
Thuthar lakhawmtute hi sorkar kaihhruaina hnuaiah Rakhine-ah hian kalpui an ni a, he state-ah hian venhimna khauh taka kalpui a la ni a. Mihring awmte chu police kaihhruaina hnuai lovah chuan kawm leh biak an phal lo.