Pakistan Prime Minister Imran Khan-a kaihhruai, Pakistan Tehreek-e-Insaf party-a an MLA thin, Baldev Kumar leh a chhungte chuan New Delhi-ah inhumhimna an zawng mek.
Baldev Kumar hi a nupui, Bhavana leh an fate pahnih nen an makpa chenna, Punjab-a Khanna khuaah thla khat chuang an khawsa tawh a. “Pakistan-a hnam leh sakhaw zuitu tlem zawkte chu kan him lo va, kan dikna chanvo pawh min pe lo. Min vauna leh thah tumna a awm reng a, kei pawh kum hnih zet lung inah ka tang tawh,” tiin Khyber Pakhtunkhwa assembly-a Barikot (reserved) seat lo luah tawh thin, Baldev hian a sawi.
Tuna an chen mekna, Khanna hi Punjab khawpui, Chandigarh atanga km 100 vela hla a ni a. Pakistan-a kir a tum tawh lo.
“Ngaihtuahna fim tak nena lo kal ka ni a, Prime Minister Narendra Modi hian khawsakna tur leh kan himna tur min ngaihtuahsak turin a khawngaihna ka dil a, min pek hram pawh ka beisei,” a ti.
Baldev hi kum 43-a upa niin Sikh a ni a, Pakistan-ah sakhaw zuitu tlem zawkte chu tihduhdah an ni thin tih sawiin Hindu leh Sikh hruaitu eng emaw zat an that niin a sawi a. “Sikh leh Hindu chhungkaw tam tak chuan India-a pem an duh a, kan Gurdwara (biak in) pawh a tlusawp nasa a, a tlem zawkte dah pawimawhna engmah a awm lo va, sakhaw inleh luihtirna tam tak a awm a, thubuai engmah an siam duh bawk si lo. Sikh nula, Islam-a inleh luihtir phei chu ngaiha neih theih khawpin a tam a ni,” a ti.
Imran Khan a tlin khan a ziaawm an beisei a; mahse, engmah a ni ta lo tih a sawi bawk.