Aizawl: Thubuai hrang hrang rang zawka chinfelna, National Lok Adalat chu Inrinni khan Mizoram chhung hmun 10-ah neih a ni a, thubuai 1,853 chin fel a ni.
National Lok Adalat hi India ram state hrang hrang, union territory-ah te bakah district tam takah huaihawt a ni a. Mizoramah chuan a hmunpui ber atan Mizoram State Legal Services Authority, Aizawl-in an office, New Capital Complex-ah an huaihawt a, Mizoram district pariata district court theuh bakah Gauhati High Court, Aizawl Bench-ah pawh National Lok Adalat hi huaihawt a ni.
Sum sen ngai lova thubuai chin felna, Lok Adalat hi tun hma pawhin huaihawt a ni tawh thin a, tun tumah hian thubuai chin fel tur lutkhawm zawng zawng hi thubuai 3.640 a ni a, heng zinga thubuai 1,853 chin fel a ni.
Heng thubuai zinga a tam ber chu telephone bill ba chungchang leh Mizorama bank hrang hrangte atanga thubuai lut, loan rul tha lote chungchang a ni a, heng bakah hian in hmun lo ram thubuai te, mi mal inkara sum inpuk thubuai te leh ro inchuh thubuaite an ni.
National Lok Adalat neiha thubuai an chin fel atanga sum an hmuh let chu Rs. vaibelchhe 6 chuang a ni.