Azl: Tun hnaia internet-a naupang kumtlinglo video mawi lo tak thehdarhtute dan anga hrem an nih theih nan Mizoram State Commission for Protection of Child Rights (MSCPCR)-in hma la.
Nimina thuchhuah an siamah MSCPCR chuan, he video thehdarhtute dan anga hrem an nih theih nan, a theih ang anga ngaihvenin Mizoram Police Cyber Crime leh District Child Protection Unit (DCPU) ten rang takin hma an lak thu an tar lang.
MSCPCR-in an tar lan danin, Section 67 B of Information Technology (IT) Act, 2000 leh Section 13, 14 of the Protection of Children from Sexual Offences (POCSO) Act, 2012 chuan hursualna kaihhnawiha naupang telna video leh thlalak thehdarhtute chu lung in tang tur leh pawisa chawi tura hrem theih an ni.
Internet leh Internet Social Media (ISM) hman kawngah nu leh paten an fate ngaihvena fimkhurpui a tul takzet thu an sawi a. Naupangte pawhin internet hman sual chungchangah danin an chungah thununna a lekkawh thei a ni tih mipuite pawhin an hriat a tul thu an tar lang bawk.