ZPM Leader Lalduhoma chuan an policy-ah tihhlawhtlin theih loh a awm loh thu leh pung awm lo loan an zuar ngai lo niin a sawi.
Thawhtannia an pisaa ZPM party chhung inkhawmah Lalduhoma chuan a duh chuan pung awm lo loan hi sorkarin a pe thei nia sawiin, “Quarantor-ah a tang thei bawk. Sorkar laipui pawhin state tinah pung awm lo SASCI loan a pe a, MNF sorkar hmasa pawh khan a pung awm loin sawhthing loan a pe a, an ngaidam zui ta nghe nghe a nih kha. Chutihrualin ZPM hian pung awm lo loan hi kan zuar ngai lo. Subsidy leh quarantor nei chite erawh kan zuar. Chuvangin, kan policy-ah tihhlawhtlin theih loh leh mipui bum tumna a awm lo,” a ti.
Party pakhatin an policy chungchangah ZPM chu loan puk leh thil dangah tihtheih loh pui intiama mipui bum tumah an puh nia sawiin Lalduhoma chuan, “A tih theihzia leh kan budget ei hek si lova tih dan, rethei dawmchhuahna tur hand holding policy tihpuitlin nan hman kan tum a ni,” a ti a. Loan chungchangah Micro, Small & Medium Enterprise Development Act 2006 chu Ministry of MSME chuan a siam tawh a, kumin April atang phei chuan loan lak theih zat hi Rs nuai 500 thlengin a tipung chho tawh a. He dan hnuaiah scheme hrang hrangte a tlangpui ringawt pawh dinchhuahna tham tur hlir a nih thu a sawi.
Lalduhoma chuan an sorkar a nih chuan mi tumruh leh taima, hlawhtlin tum tak takte chu line department tinten uluk takin an thlang dawn a, an en zui dawn bawk tih a sawi a. Loan la tur thlan hi party behchhanin an kalpui dawn lo va, vote zawn nan hman an tum hek lo tih sawiin, “A tul ang zelin bank-te nen MoU-te ziakin kan kalpui dawn a ni. Pung awm lo loan erawh kan zuar lo va, a pung tlem chi te, subsidy leh guarantor nei chite erawh kan zuar a ni,” tia sawiin, a duh chuan state sorkar hian pung awm lo loan a pek theih thu leh, bank-in a pung a hauh kha a then emaw, a vaiin emaw, a tumsak thei niin a sawi bawk.
ZPM party chhung inkhawm hi HL Chhinga, Adviser-in a kaihruai a. Aizawl West II ZPM Candidate Lalnghinglova Hmar pawhin thu a sawi ve bawk.