Germany in an ram football chanchin a vawikhatna atan an manager an ban a. Hansi Flick chu Inrinni zana Japan laka an mualpho hnuah a hna atangin an chawlhtir.
Germany hian tun kartawp khan international friendly inkhelah Japan chu Wolfsburg-ah an mikhual a, 4-1 in an tlawm. Hei hi tunhnai match nga atanga vawi li an tlawmna a ni.
Flick hnuaiah hian kum 2021 August a Joachim Low thlak tura an lakluh hnuin match 25 an khel tawh a, vawi 12 chiah chak an nei. Hei vang hian kum 1926 a an team manager hna an siam atangin an mi rawih lai an ban hmasak ber a ni.
- Thuk zawkin
Kum 58 mi Flick hi kum 2006 atanga 2014 chhung khan Germany-ah hian Low-a assistant manager a ni a. Die Mannschaft a enkawl tan tirhin an match hmasa pariatah hnehna a chanpui a, beisei a sang hman hle.
Nimahsela an result a chhe zawngin a kal zel a, nikum World Cup khan group stage an paltlang zo lo. Tunhnai thla 12 chhungin Oman, Costa Rica leh Peru te chiah he German team hian an hneh.
A rual hian a assistant pahnih Marcus Sorg leh Danny Rohl te chu ban ve nghal an ni bawk.
Japan laka an tlawm hnuin Flick chuan an result chu a beidawnthlak hle tiin a sawi a, mahse Germany enkawl tur manager dik a la nih thu a sawi tel. Hetihlai hian, “Professional football-ah chuan thil a inthlak danglam chak hle a, hei vang hian thil thleng tur ka hre lawk lo.” tiin a sawi tel.
Kum 2019 November atanga 2021 June chhungin Bayern Munich enkawlin match 86 atang vawi 70 a chakpui a, 2019-20 season khan ‘treble champion’ a nihpui theih avangin a lakah beisei a sang hle a, nimahsela a zuih ral ta a ni.
- Tunge thlak dawn?
German FA chuan Flick hi kum 2000 atanga 2004 chhunga Germany enkawltu Rudi Voller chuan France nena an inkhel turah a thlak dawn tih an sawi a, February thla khan German team director atan lakluh a ni.
A thlaktu nghet tur erawh an lalut thuai dawn tih an sawi tel bawk.
Tun dinhmunah Bayern Munich a Flick thlaktu Julian Nagelsmann chu sawi rik a ni a, kum 38 mi hi Bayern in March thla a an chhuahtir hnuah hna dang chelh a la nei lo. Ani bakah Austrian mi Oliver Glasner pawh sawi tel a ni.