Shiv Sena MP Sanjay Raut chuan nakuma Uttar Pradesh leh Goa-a assembly inthlan lo awm tur chu an chuh ve dawn tih a sawi a, Uttar Pradesh khawthlang lama dan thar duh lotu lo neitu pawlte chuan an thlawp dawn niin a sawi bawk.
Raut hian Pathianni khan thuthar lakhawmtute hnenah Shiv Sena hian Uttar Pradesh-a bial 403 awmah bial 80 atanga 100 vel an chuh dawn thu leh bial 40 awmna, Goa-ah pawh bial 20 chuangah an chuh dawn thu a sawi.
“Uttar Pradesh khawthlang lama lo neitu pawlte chuan Shiv Sena thlawp an tum a, party tenau dangte nen pawh kan thawkho mai thei a. Goa-ah pawh MVA anga kal dan tur kan dap a. Kan hlawhtling dawn em lo thlir ila,” tiin Rajya Sabha member chuan a sawi.
Raut hian state pahnihah hian Shiv Sena chuan mi an nei nual tawh tih sawiin tlin leh tlak chu engpawh ni sela, inthlan an chuh dawn niin a sawi.
Kum 2019-a Maharashtra assembly inthlan hnuah khan Shiv Sena hian hun rei tak an lo thawhpui tawh, BJP chu chief minister tur inchuhna avangin an kalsan a, NCP leh Congress nen tangrualin Maha Vikas Aghadi (MVA) sorkar an siam zui ta a ni.